Phin sa lyngngoh ha u snem 2028 lehse na Mawlai u MLA un dei na ka HSPDP: Methodius

Sa shisien pat ka seng saiñ hima-sima ka Hill State People Democratic Party (HSPDP) hapoh ka Nongstoiñ Konstitwensi ka la ïoh mynsiem hadien ka jingwan phai biang jong ki ba bun ki nongkyrshan bad ki...

Nongstoiñ, K’lyngkot 23

Sa shisien pat ka seng saiñ hima-sima ka Hill State People Democratic Party (HSPDP) hapoh ka Nongstoiñ Konstitwensi ka la ïoh mynsiem hadien ka jingwan phai biang jong ki ba bun ki nongkyrshan bad ki nongkitkam, ki ‘riew rangbah kiba la iehnoh ïa la ka seng ha ki snem ba la lah.

Kane ka la paw ha ka jingïalang kaba la pynlong ha Bishop Hall Nongstoiñ ha ka 23 tarik mynta u bnai, ha kaba bun ki paidbah ki la wan ban ïashimbynta ha kane ka jingïalang, wat la ka dei tang ka jingïalang ban ïakynduhlang jong ki nongkitkam.

Ki katto-katne ki ‘riew rangbah kiba la wan phai biang sha ka HSPDP ki kynthup ïa u Bah Kwikstinhwell Lyngdoh, Samuel Marngar, Markus Marweiñ, Roding Lyngdoh, Bes Thongni bad kiwei kiwei ïa kaba ka kyrtong jong ka HSPDP na Nongstoiñ ka Kong Badariti Lyngdoh Nonglait ka la ïoh ban pdiang burom sha ka sem jong ka HSPDP.

Ka Kong Badariti Lyngdoh Nonglait haba kren ha kane ka sngi ka la ong ba mynta ka don ka jingkyrmen ban tei pat ïa ka HSPDP ba sa shisien u Sing uba la ju kyrhuh sawphew tylli tam ki snem na Nongstoiñ Konstitwensi un kyrhuh biang sa shisien.

Ka Kong Badariti ka la ong ba ka jingwan ïakhun jong ka ïa ka ilekshon na Nongstoiñ kam dei ka jingkwah hi jong ka hynrei dei ki nongïalam jong ka HSPDP na Nongstoiñ kiba khot ïa ka.

Shuh shuh ka la ong ruh ba shisien pyrkhat kum ka briew ka long kaba eh than ïa ka ban wan ïaleh na Nongstoiñ, namar ha ka ilekshon ba la dep la ïoh tang kumba 12 spah vote hynrei ka Kong Badariti ka la pynpaw da kaba ong, “Nga kynmaw ïa ka jingpan jong nga na u Maieid ban ïatrei ïa ka seng bad nga ïohi ïa ki jingkyrkhu na u Maieit balei ngan tieng ban ïaleh na Nongstoiñ bad kito kiba ong bad thut ba nga dei ka nongwei ngan ai ka jingkular kaba skhem ba ngan nym pynlehraiñ kumba u Maieid Hoping ruh u khlem dei u trai shnong hynrei u ai ka jingshakri kaba bha”.

Katba u MLA ka HSPDP na Mawshynrut, Bah Methodius Dkhar pat u la ong ba bun ki nongïalam kiba kham shemphang ki la sdang ban phai khmat biang sha ka HSPDP.

U la ong ruh ba “Phin sa lyngngoh ha u snem 2028 lehse na Mawlai u MLA un sa dei na ka HSPDP bad kane ka dang don ha ka jingpynkhreh kaba jar-jar bad phin sa ïohi katto katne bnai ïa kane ka jingpynkhreh na Mawlai Konstitwensi ba ha u 2028 ka HSPDP kan kaweh ïa ka lama”.

Shuh shuh u la ong ruh “Mynta haba ngi don hapoh ka Sorkar, nga sngew sarong ban ïathuh wat la ki don kiba ong ba ngi la klet ïa kata ka ri bad ka jaidbynriew hynrei kumba phi ïohi mynta lyngba u Myntri ka tnat ïalehkai uba dei na ka HSPDP, ym pat ju jia hapoh ka Jylla ba ha ka shi snem ar snem ba phin ïoh ïa ki 20 haduh 30 tylli ki madan ïalehkai kiba bha, hato kane kam dei ba ka seng ka trei shitom na ka bynta ka ri bad ka jaidbynriew?”.