Shillong, K’lyngkot 23
Ka Shillong All Faiths Forum (SAFF) ka la pynpaw ïa ka jingbym sngewtynnat halor ka jingkam jong ka Kutum-ba Surakshya Parishad (KSP) na Assam, ba ka jingïakynad ba dang shen ha Mawkynrew ka dei ka jingleh bym burom ïa kiwei ki niam.
“Ka SAFF kam pdiang satia ïa kane ka seng, ka la pyni ïa ba nang pynbitar ïa ka jingjia ha Mawkynrew ban pynheh sha ka jingïakynad ne ïapait-ïapra. Kane ka dei kajuh ka seng kaba la byrngem dang shen ïa ki briew jong ngi da kaba pakhang surok ha kaba ïadei bad ka kam jngohkai ha ka Jylla jong ngi”, la ong u Vice President ka SAFF, Bah Noor Nongrum ha ka kyrwoh.
U Bah Nongrum u la ong ba katkum ka jingïohi ha ki lad pathai khubor, ki paidbah kiba ïadon bynta ha ka jingjia ha Mawkynrew kim dei kiba la ithuh na ka jingïadei niam bad ka long kaba bakla shibun ïa ka KSP ban shu pynmut bad kynnoh ïa ki paid Khristan ha kane ka rukom.
Ka SAFF ka kyntu ruh ïa ki paidbah bad ïa ki nongïalam shnong jong ka thaiñ Mawkynrew ban ïatreilang bad ki bor ba dei khmih ha ka ban pynbeit ïa kane ka kam da ka jingïasngewthuh jingmut lang bad ban peit ba ka suk ka saiñ kan neh ha ka thaiñ.
Kane ka seng ki Hindu ka la kynnoh ba ka don ka jingshah niam bad ka jingpyrshah jong ki kynhun Khristan, kaba la pynmih ïa ka jingïakynad ha Mawkynrew dang shen, halor ka jingshna ïa ka ïing skul jong ka Ram Krishna Mission.
Halor kane ka jingkynnoh ka KSP, na ka liang ka HYC ruh ka la pynpaw ïa ka jingpyrshah kaba jur.
“Kine ki jait jingkren kim don eiei, hynrei ka dei tang ka jingpyrshang jong kane ka kynhun ban bet ïa u symbai jong ka jingsngew ïapher niam ha ka jylla jong ngi bad pynbakla ïa ki jingjia baroh kawei, khlem da pynshisha shwa ïa kaei kaba jia baroh, kumta dei ban pynrem jur da baroh”, la ong u President ka HYC, Bah Roy Kupar Synrem ha ka kyrwoh khubor.
U la ong ba ka KSP ka dei ban kiar ha ka ban ai ïa kum kine ki jingkynthoh ki bym don satia ïa ka jingkitkhlieh, namar ba ka lah ban lam sha ka jingma ïa ka shongsuk-shongsaiñ jong ki ‘riewngeit na ki niam bapher-bapher bad ki jaidbynriew hapoh ka jylla.
“Ha ka jingshisha ka KSP kam dei ban peit ba kaei-kaei kaba jia baroh hapoh ka Jylla Meghalaya ba ka dei kaba long pyrshah ïa ki Hindu, bad ka la shu pynkut ba ka don ka jingïasuhbuit jong katto-katne ki seng na ki kynhun niam ban leh pyrshah ïa kawei pat ka niam”, la ong u Bah Synrem.
Na ka liang u nongïalam ka HYC u la khot ïa ka KSP ba ki dei ban pynshisha shwa ïa kaei kaba jia bad hadien kata ba kin ai ïa ka jingkren, ym ban pynmih shwa ïa ki jingkren kiba ai ding bad ban sa kylla ktien noh hadien.
“Ngi kyntu ruh ïa ki ba ki dei ban sangeh noh ban tuklar palat ïa ki kam hapoh ka Jylla ka jong ngi”, pynkut ka kyrwoh na ka HYC.
