Shah ujor ejahar u CEM ba kynnoh byrngem lyngba ka ‘Phone’

Ha kane ka jingujor, une u nongtrei mon sngewbha u la ong ba u tieng ïa la ka jingim bad ruh ïa ka jingim jong ki bahaïing hadien ka jingïakren bad u CEM.

Tura, K’lyngkot 23

U Nilbath Ch Marak uba dei uwei na ki nongtrei mon sngewbha u la ujor da ka ejahar pyrshah ïa u CEM jong ka Garo Hills Autonomous District Council (GHADC) u Albinush Marak hadien ba la kynnoh ba u CEM u la byrngem ïa u lyngba ka ‘phone’ ha ka step jong ka 23 tarik mynta u bnai.

La ong ba kane ka jinglong jingman ka la long hadien ba u Nilbath lem bad uwei u nongtrei mon sngewbha u Flaming Marak ki la ujor mukotduma pyrshah ïa u CEM halor ka jingpyndonkam bakla ïa ka pisa na ki kam bym pat lah ban pyndep hapoh ka konstitwensi jong u, ka Siju. Ïa ka mukotduma la ujor sha ka Meghalaya Lokayukta ha ka 21 tarik mynta u bnai, ha kaba la bthah ban don ne sdang noh ïa ka jingtohkit.

Ha ka ejahar kaba la ujor ha Williamnagar, East Garo Hills, u Nilbath u la ong ba u la ïohpdiang ïa ka ‘phone call’ na ka number jong u CEM ha kane ka step, ha kaba u Albinush u la bthah ïa u ban weng noh ïa ka mukotduma ba la ujor sha ka Lokayukta.

U Marak u la ïohpdiang ka ‘phone call’ ha ka por 9:13 mynstep ïa kaba la ‘record’. Ha ka jingïakren hapdeng jong ki, u Nilbath u la kynnoh ba u CEM u la byrngem ïa u da kaba ong ba un sa peit kai.

Ka ejahar ka la ong ba u Albinush u la kynnoh ïa utei u nongtrei mon sngewbha ba u la dawa pisa ha ka kyrteng jong ka jingujor mukotduma, ïa kaba u la ong ba kane kam long kaba shisha bad kaba kwah tang ban pynthohbria.

Ha kane ka jingujor, une u nongtrei mon sngewbha u la ong ba u tieng ïa la ka jingim bad ruh ïa ka jingim jong ki bahaïing hadien ka jingïakren bad u CEM.

“U la ong ïa nga ban weng noh ïa ka mukotduma kiba dang sahteng hapoh ka ïingbishar. Ki don haduh 22 ngut ki kontraktor bad lada mano-mano ruh napdeng jong ki, ki rai ban ktah kti ne pynmynsaw ïa nga ne bahaïing jong nga, u CEM u dei ban bahkhlieh,” la ong u Nilbath lyngba ka ejahar.