Shillong, K’lyngkot 23
U Myntri ka tnat Bording (Power), Abu Taher Mondal u la ong ba kam don satia kano-kano ka jingthmu na ka liang jong ka Sorkar ban aiwai noh sha ki kynhun shimet ïa ka Meghalaya Energy Corporation Limited (MeECL).
Kane ka jingkren ka la mih hadien ba ki Nongïalam ka Khun Hynñiewtrep National Awakening Movement (KHNAM) ka la pan jingpynshai halor kane ka kam ha ka Sngi Palei.
Haba kren bad ki lad pathai khubor hadien ba la ïakynduh ïa ki Nongïalam jong ka KHNAM, u Myntri u la ong ba ïa mynta hi kam don satia kaba kum kata ka jingpyrkhat.
“Ngi dang trei shitom ban ïohi ba ka MeECL kan khie- khlieh biang bad ban pyllait na baroh ki jingeh ba ka ïakynduh namar ba ka pla tyngka jong ka mynta ka la kham biang. Halor ki kam ba ïadei bad u paidbah, kynthup ha ka jingsam ïa ka bording, ka jingtan bad jingpynmih bording ruh ka la kham khlaiñ khnang ba ka MeECL kan don ha ka jaka kaba biang”, la ong u Mondal.
U Myntri u la ong ba ka dei ka jingshisha ba saw tylli ki sub division la shu aiwai sha ar tylli kompani, kawei ka dei ka Chicomputer kaba khmih ïa ka Dalu, bad kawei pat ka dei ka FEDCO kaba khmih ïa ka Phulbari, Nangal bad Mawsynram.
U la ong ba ka jingtreikam jong ka Chicomputer ka biang bha, bad kam don satia ka jingpynsah ïa ka jingsiew, hynrei ka tnat ka kham khuslai khyndiat haba phai sha ka FEDCO namar ka pynsah ïa ki jingsiew.
“Ngi la dep phah da ka jingthoh ‘show cause’ da kaba ngi la maham ruh ba ngi lah ban shim noh da ki lynti ka aiñ pyrshah ïa ki lane ban weng syndon ïa ki na ka kam. Baroh kine ki kam ki la ïaid bad kine ki kam ki dei tang halor ka jinglum ïa ki bai thang bording”, u la ong.
Haba ïadei bad ka Smart Meter, u Mondal u la ong ba kane ka dei ka rai jong ka Sorkar Pdeng bad ka Power Ministry ban ai ïa ki smart meter sha baroh ki Jylla bad baroh ki Jylla ki la jam shakhmat bad kane ka projek, ha kaba u la bynrap ba ka tnat ruh mynta ka dang bud ïa ka jingbthah jong ka Power Ministry.
Halor jong kane ka jingïakynduh ïa u Myntri, na ka liang u Working President ka KHNAM, Bah Thomas Passah u la ong ba ka seng ka la ïoh jingpyntip ba ka Sorkar Jylla ka la ïaid shakhmat ban aiwai noh sha ki riewshimet ïa ka kam pynmih bording hapoh ka Jylla.
“Ngi tip ba ka Sorkar ka la dep aiwai ïa saw tylli ki sub-station. Ngim kwah satia ban aiwai ïa baroh ka kam pynmih bording sha ki kompani shimet namar ngi sheptieng ïoh ki nongthang bording ka Jylla kin hap mad ïa ki jingkit kaba khia ha ka pisa-pilaiñ lada aiwai ïa ka kam pynmih bad sam bording”, u la ong.
U Bah Passah u la ong ba ha ka jingïakynduh ki la ïoh ïa ka jingpynshai, bad na ka liang u Myntri u la kular ban shim khia ruh ha kaba ïadei bad ka jingpyntreikam ïa ki smart meter ban ym don ka jingthut ha ka rukom siew. Nalor kane u la ïathuh ba u Myntri un sa bishar ïa ki lad ki lynti ban ym pynkhia than ïa ka bai thang bording.
Shuh shuh, u Bah Passah u la ong ba ka seng ka la ïakren ruh halor ka jingpyntreikam ïa ka Consumer Rights to Electricity Act, 2020, namar katkum kane ka aiñ ka long ban ïada ïa ka hok kiba pyndonkam ïa ka bording. U la ïathuh ba halor kane, na ka liang u Myntri u la ong ban pyrshang ban ym wanrah jingthut ha kaba ïadei bad ka jingpynbiang ïa ka bording, bad ban kiar ruh na ka jingpyntreikam ïa ka load shedding, khnang ba ki paidbah kin ym ïakynduh jingeh.
