
Shillong, K’lyngkot 24
U Symbud Myntri Rangbah uba peit ïa ka tnat District Council Affairs bad ka tnat Pulit, Bah Prestone Tynsong, u la ong ki Deputy Commissioner kin sa ai ka kaiphod kaba pyni ïa ka jingdonkam ïa ki bor pahara ha Rilum Khasi bad Jaiñtia na ka bynta ka jingpynlong ïa ka ilekshon sha ka Ïingdorbar Khasi Hills Autonomous District Council (KHADC) bad Jaiñtia Hills Autonomous District Council (JHADC) ka ban thep vote ha ka 21 tarik Rymphang.
Ka KHADC ka don 1,798 tylli ki jaka thep vote ha baroh 29 tylli ki konstitwensi, katba ka JHADC ka don tang 483 tylli ki jaka thep ha baroh 29 tylli ki konstitwensi.
Na ka liang ki DC kin hap ai jingkheiñ ryngkat ki SP ban tip katno ka jingdonkam ïa ki pulit pahara na ka bynta kane ka ilekshon ha kaba yn sa ai jingkheiñ ruh ïa ka jingdon ki jaka thep vote kiba kham don ka jingïakhluit bad shongshit ilekshon.
U Bah Prestone u la ong ba ka Sorkar kan sa mynjur ban mang shuh ïa ka jingdonkam bor pahara na ka bynta ban pynlong ïa ka ilekshon kaba ïaid beit bad jai-jai ha baroh ar tylli ki Autonomous District Council (ADC).
Haba kylli shaphang ka jingmang pisa na ka bynta ki jingpynlut ha kane ka ilekshon MDC, u Bah Prestone u la ong ba ïa kane yn sa lah ban ai jingkheiñ ynda ki Deputy Commissioner na baroh ki district kin sa phah ïa ki jingdonkam kiba dei ban mang ïa ka pisa ban pynlut ha kane ka ilekshon.
Ki ar tylli ADC ki hap ban bei pisa lang na ka bynta ki jingpynlut haba pynlong ïa kane ka ilekshon.