Nongstoiñ, K’lyngkot 24
Ka National People’s Party ( NPP) Nongstoiñ Block ha ka 24 tarik u Kyllalyngkot ka la ïoh ban lum lang ïa ki nongkitkam jong ka seng na ka bynta ban ïakren bad ïamir jingmut kumno ban pynkhlaiñ ïa ka seng ha kane ka ilekshon MDC ïa kaba la pynlong ruh ïa ka jingïalang ha Bishop Hall, Nongstoiñ.
Ha kane ka jingïalang, nalor u kyrtong ka seng u ban ïakhun na Nongstoiñ, Babu Dresser Marngar, la donlang ruh u Bah Embhah Syiemlieh, Secretary State NPP, Bah Mebanri Laloo, Secretary State NPP, u Bah Manoi Byrsat, Working Nongstoiñ Block, ha ka jingdonlang ruh u Bah Macmillan Byrsat, MLA barim ka Nongstoiñ ha kajuh ka por, kum u District President ka NPP, u MLA ka Nongstoiñ, Bah Gabriel Wahlang kum u President ka NPP Nongstoiñ Block, bad ki spah ngut ki paidbah bad kiwei-kiwei.
U kyrtong ka NPP na Nongstoiñ, Babu Dresser Marngar haba kren ha kane ka jingïalang u la kyntu ïa baroh ki nongtrei jong ka NPP da kaba u la pynpaw da kaba ong, “To ngin ïatrei da ka mynsiem jong ka jingsngew rit, da ka mynsiem jong ka jingsngew ieid, da ka mynsiem jong ka jingïa sngewthuh jingmut bad ka jingïa ai jingmut ba mar kylliang.”
Shuh shuh u la bynrap, “Nga ju mutdur bha ba ngi dei ma ngi hangne ki nongtei kiba thymmai, ki nongwanrah ki kam pynroi hapoh ka konstitwensi baroh kawei bad lada ngi, ngi don ka jingïapher jingmut, ka jingbym sngewthuh jingmut …ka long kum ban ïalehkai ïa u paidbah jong ka konstitwensi, kaba ki paidbah ka Nongstoiñ ki ap khmih lynti khliaw baroh khoit ba kumno ngi saiñ dur bad thaw thymmai na ka bynta ban pynphuh-pynphieng bad pynroi pynpar ïa ka konstitwensi baroh kawei.”
U la khot ïa baroh ba kin ïa mih ryntih ban ïatrei ban pynkhlaiñ ïa ka seng khlem kano-kano ka jingsngewpher jingmut, ka jingsngew mong ïa kiei-kiei baroh.
U Babu Dresser u la ong ruh ba “To ngin ïa klet noh bad ngin ym kyrtiang dien shuh ïa ka myhynnin hynrei ngin phai khmat sha ka mynta na ka bynta ka la shai kaba bha.”
