Shillong, K’lyngkot 24
U Working President ka United Democratic Party (UDO), Bah Titosstarwell Chyne, u la ong ba ka UDP ka dei kawei ka seng kaba la shah kawang ktieh bha ha kane ka ilekshon, da kaba kynnoh ba ka UDP ka dei ka seng kaba shu sdien bos.
“Ngam sngewthuh ha kano ka dur ngi sdien ïa kata ka bos, ka UDP hapoh district council ka la ïalam ïa ka executive committee, ngi khlem sdien bos, lai snem shiteng nga la long kum u CEM bad hadien ba nga la shah pynhap noh kum u CEM ngi khlem sdien bos, hynrei ngi shong ha ka Liang Pyrshah, kat haduh mynta nga dei u Nongïalam ka Liang Pyrshah”, la ong u Bah Titosstarwell haba kren ha ka jingïalang pynbna kyrtong ha Mawkynrew konstitwensi ha ka Sngi Thohdieng.
“Phi lah ban ong pat ba hapoh ka Sorkar Jylla ka UDP ka ïatreilang bad ka NPP. Ki mat jong ka Jylla ki ïapher na ki mat jong ka district council”, u la ong.
U Nongïalam ka UDP u la ong shuh-shuh ba kane ka dei ka ilekshon MDC bad kam pat dei ka por ban ïakren ïa ka mat lane ka ishu MLA.
U la ong ba ha ka por ba u long Chief Executive Member ha KHADC, ka Sorkar Jylla ka la thmu ban pyntreikam ïa ka CrPC bad CPC ban weng ïa ka bor ban bishar mukotduma da ki kashari jong ka district council, hynrei na ka liang ka KHADC ka la ïakhun haduh Supreme Court bad mynta ki kashari jong ka district council ki la ïoh biang ïa ka bor ban bishar ïa ki mukotduma.
“Ha ka por ba nga long CEM, ïa ki ishu ba ngi hap ban pyrshah ngi pyrshah. Ka don kawei ka ishu ba ka Sorkar Jylla ka la wanrah ban pyntreikam ïa kata ka CrPC bad CPC, kaba ïadei bad ka bor jong ka ïingkashari jong ka district council, namar ha district council ngi don ïa ka bor ban bishar, ngi don ïa ki district council court, hynrei na ka liang ka Sorkar Jylla ka la weng ïa kata ka bor”, la ong u Bah Titosstarwell.
U la ïathuh dang shen ka KHADC ka la mudui sha Supreme Court bad mynta ka Supreme Court ka la pynsangeh ïa kane ka jingknieh bor jong ka Sorkar Jylla, bad bynrap ba ki don shibun ki ishu kiba ïaleh pyrshah ym dei ba ngi shu sngap, hynrei ki don ruh ki ishu kiba hap ban ïatreilang na ka bynta ka bha ka miat ki paidbah.
