Mawkyrwat, K’lyngkot 24
U Myntri Rangbah ka Jylla, Conrad K. Sangma u la hukum ïa ki ophisar ba ki dei ban pynshitom ïa kino-kino ki nongtrei Sorkar lada jia ba lap ba ki wan sha ki kam bad jingtrei hapdeng ka jingbuaid kyiad.
Kane ka jingkren jong u Myntri Rangbah ka la wan hadien ka jingïamir jingmut bad ki paidbah ka thaiñ Ranikor ha ka ‘Block Level Community Interaction Programme’ lyngba ka ‘CM Connect Programme’ ha Pamdaba, Ranikor ha kaba kawei ka longkmie ka la ïathuh hakhmat u Myntri Rangbah bad ki paidbah ba ki don ki hati khlaw kiba ju wan pynjot na ka por sha ka por ïa ki ïing ki sem bad ki jingthung jingtep ha kawei na ki shnong ha thaiñ Ranikor hynrei haba ujor sha ki bor ba dei peit bunsien ki ju poi slem bad ynda ki wan ruh ki wan pynban ha ka jingbuaid bad kim nang shuh ban treikam.
Kumta, u Myntri Rangbah u la khot ïa u Range Officer jong ka Nongstoiñ bad u la ong ba kane ka dei ka kam ïap kam im jong ki paidbah bad u la kylli, “Hato phi phah da ki briew ba buaid? Pyntikna ban pynshitom ïa kiba kum kita bad lada nga ïoh jingtip ïa kum kita ruh ngan pynshitom da kaba tyngeh namarba ngim lah ban pdiang da lei-lei ba kin buaid ha ka kam. Ka por dih ka don bad ka por trei ruh ka don,” ong u Myntri Rangbah.
Ha kane ka sngi, na ka liang u Myntri Rangbah ka Jylla u la ïoh ban ïakren markhmat bad ki paidbah ka thaiñ Ranikor ban tip ïa ka jingeh jong ki bad kumno ban thaw ïa ki lad ki lynti bad kiwei ki mat ba ki paidbah kane ka thaiñ ki la pynsngew ha u Myntri Rangbah ki kynthup ïa ki surok, ki skul, umbam-umdih, ka ding ilektrik, ka jingbym ïoh skhim shuh ïa ki bym pdiang ‘Adhaar’, bad kumjuh ka kam jngoh kai pyrthei.
Ha kaba ïadei bad ka kam jngohkai pyrthei, u Myntri Rangbah u la ïathuh ba ka Tourism Department ka la dep ban mang haduh T. 32 klur na ka bynta ban shna ïa ka ‘Resort’ bad pynbha ïa ka jaka jngohkai pyrthei hapoh Domsohkhai-Nongnah.
Ïa ka bording ne kor bording kaba don ha Nonghyllam kaba la sangeh mynta la shi snem ei ei, u Conrad Sangma u la bthah ïa ki bor ba dei peit ba dei ban pyntreikam noh ha kane ka taïew.
Ha kaba ïadei bad umbam-umdih na ka bynta ban pynpoi um sha thaiñ Khonjoy lyngba ka skhim JJM, u Myntri Rangbah u la bthah ïa ka tnat PHE ba ka dei ban pyndep hapoh u Lber, 2025.
Na ka liang u Sangma ha kane ka sngi u la kular ban ai jingïarap ïa kawei ka skul shimet ha ka shnong Keniong lyngba ka Chief Minister Development Scheme hadien ba ka la don ka jingud jingnam na ka liang ki nongshong shnong bad ha kaba ïadei bad ka jingkwah jong ka shnong Pormawdar ban don noh ïa ka jaka treikam jong ka Veterinary, u la ïoh jingmynjur ba ka shnong kan ai ïa ka jaka ban shna.
Ha kane ka sngi la ïoh ruh ban sam ïa ka song pisa kaba kot haduh T. 12 lak tam sha ar tylli ki Village Organization, ka Mahila Village Organization na shnong Sudorgora bad ka Mangragalani Village Organization na shnong Upper Rajapara.
La synranlang ïa u Myntri Rangbah da ka Myntri ka tnad ka koit ka khiah, Dr. M. Ampareen Lyngdoh, MLA ka Mawkyrwat, Bah Renikton L. Tongkhar, MLA ka Ranikor, Bah Pius Marweiñ, Deputy Commissioner, South West Khasi Hills District, Bah B. Mawlong nalor kiwei-kiwei.
