
Shillong, K’lyngkot 24
Ka Hynñiewtrep Youths’ Council (HYC) Education Cell ha ka Sngi Thohdieng ka 24 tarik Kyllalyngkot, 2025, ka la leit ban ïakynduh ïa ki ophisar jong ka tnat Pule-Dangle ka Sorkar Jylla hapoh ka ophis treikam ha Secretariat hadien na ka liang jong ka tnat lyngba u Secretary bad Commissioner ka tnad Pule-Dangle ka Sorkar Jylla, u la khot ban ïakren ïa ki nongïalam jong ka seng hadien ba ki dkhot jong ka seng ki la leit ban khang tala ïa ka ophis treikam jong ka Directorate of Higher and Technical Education (DHTE) ha ka 22 tarik u Kyllalyngkot, 2025.
Kum ban shu kdew hangne, na ka liang ka Hynñiewtrep Youths’ Council (HYC) Education Cell hapoh ka jingïalam u samla Enlang Sawïan kum u Education Secretary, ha ka 22 tarik u Kyllalyngkot, 2025 ki la leit leit khang tala shisyndon ïa ka ophis DHTE kaba don ha Laitumkhrah hadien ka jingïohpdiang ïa ki jingujor na kiba bun ki samla pule ka Jylla halor ka jingslem bad ka jingbym pat ïoh jong ki ïa ka bai bam ne ka ‘scholarship’ ha ka wat ba lai ka ‘Pre-Matric bad ka Post-Matric Scholarship’ kaba hap hapoh ka ‘Umbrella Scheme’ na ka bynta ki khynnah pule ka Jylla.
Katkum ka kyrwoh ba la phah da u samla Enlang Sawian, Education Secretary ka HYC Sengkmie, u la ong ba ka seng ha kane ka jingïakynduh ïa ki ophisar jong ka tnat pule-dangle ka Sorkar Jylla, ka la buh ruh ïa ar tylli ki mat jingdawa hakhmat ka Sorkar, kata ka long ban dawa ïa ka tnat pule-dangle ka Sorkar ban kham pynkloi ban phah ïa ka ‘Utilization Certificate’ halor ka jingpyndonkam ïa ka pisa bai-bam kaba la sam sha ki khynnah pule hapoh u Nailur jong man la u snem sha ka tnat pule-dangle ka Sorkar Pdeng bad kumjuh ban thaw da ka ‘Separate Cell’ ka ban peit thik-pa-thik tang ïa ki kam kiba ïadei bad ka jingpyllait ïa ka bai-bam jong ki khynnah pule ka Jylla.
Na ka liang ka Sorkar Jylla lyngba u Commissioner and Secretary of Education, u la mynjur bad pdiang ïa kine ki mat jingdawa jong ka seng bad u la kular ruh ba ka Sorkar kan sa shim ïa ki lad-ki lynti ban ïakren bad ka tnat pule-dangle ka Sorkar Pdeng bad ban pyllait noh mardor ïa ka wat ba lai jong ka ‘Pre-Matric bad Post-Matric Scholarship’ na ka bynta ki khynnah pule ka Jylla kaba dang sahteng haduh mynta.
Shuh-shuh, na ka liang ka Sorkar ka la kular ruh ban shim ïa ki sienjam ban pynthikna ba ka jingeh jong ki khynnah pule ha kaba ïadei bad ka jingïoh ïa ka bai-bam ka jong ki khnang kum kine ki jingjia ha ka ban pynslem ban ïoh ïa ka bai-bam ki khynnah pule kan ym bteng shuh ha ki snem ban wan bad ba ka bai-bam ka dei ban wan ha ka por kaba biang.