
Shillong, K’lyngkot 25
U MLA ka BJP na South Shillong uba dei ruh u Chairman ka MTDC, Bah Sanbor Shullai ha ka sngi Saitjaiñ u la plie paidbah sa kawei ka surok ha shnong Mynsaiñ, Upper Lumparing, bad ha kane kajuh ka sngi u la leit ban plie ruh ïa ka surok ba la pynïar ha Mawnei, Lower Lumparing.
Haba kren ha ka jingïalang ha kane ka sngi, u Bah Sanbor u la ong ba ka ktien tymmen ka ong, “Ki kam ki kren kham jam ban ïa ka ktien ‘work more talk less'”. U la ong ba haba peit mynta bun ki nongkren sha ïew sha surok sha lynti synkien, ki leit kren da ki phew kynta, bad bynrap ba la jur sa tang ka jingkren katba ka kam pat ym ler.
“Phi lah ïohi, mynta kiba bun ki nongïalam ki lapmiet sa tang ka kren ha rud surok, hynrei ka kam pat ym ler, iwei i ‘footh path’ ruh ym ju ïohi ha shnong lajong”, la ong u Bah Sanbor.
Ha kaba ïadei bad ka surok ba u la khap ribbon ha Mynsaiñ, u Bah Sanbor u la ong ba kane ka surok ha Lumparing ka dei kaba ki paidbah ki la ud mynta la 40 snem.
“Mynshwa kane ka jaka ka dei da ka khlaw suda, bad ki briew ruh ki salia ban mih ynda la janmiet, hynrei namar ka jingstad jong phi ki paidbah ban jied ïa u Bah Sanbor ban long u MLA jong phi, kane ka jaka na ka khlaw ka la long sor”, u la ong.
U la ong ba ki paid katei ka thaiñ mynta ki la suk hadien ba la lah ban wanrah ïa ka surok da ka jingkyrshan lang ki ka dorbar shnong bad ki paidbah kiba la ai jaka kylluid mynsiem khlem da hap siew pisa. U MLA u la pynpaw ruh ka jingsngewnguh ïa baroh ki trai jaka kiba la pyni ka nuksa ba bha da kaba aiti kylluid mynsiem ïa ka jaka jong ki na ka bynta ka jingmyntoi lang hapoh ka shnong.
Ïa ka surok ha Mynsaiñ kaba la dep pyntrei ka long lyngba ka jingmang pisa na ka tnat PWD (Roads) hapoh ka SPA, ha ka jinglut kaba long T. 1 klur 38 lak 70 hajar.
Hadien kane na ka liang u Bah Sanbor Shullai u la hiar ruh sa sha Mawnei ha Lower Lumparing ban plie ïa ka surok kaba la pynïar, kaba la lah ruh ban pynïeng kali. Ïa kane ka surok la pynïar da kaba tap noh ïa ka wah kaba rit kaba ïaid lyngba katei ka shnong, ïa kane ka projek ruh la bei tyngka lyngba ka tnat PWD (Roads) hapoh ka SPA ha ka jinglut kaba long T.1 klur 13 lak 44 hajar.