Bym lah jubab ïa ka RTI ha ka por ba biang, hap siew kuna ka DMHO-EGH

Hynrei ïa ka dur jong ka 'treasury challan' la ai ban pynshisha ba la siew ïa ka kuna katkum ka jingbthah jong ka SCIC.

Williamnagar, K’Lyngkot 25

Ha ka kaiphod kaba kham slem, hadien ba ym shym la lah ban jubab ïa ka RTI ha ka por kaba biang jong u nongtrei mon sngewbha, u Nilbath Ch Marak, u PIO jong ka DMHO – East Garo Hills (EGH) – ka jingsiew kaba T.3000 la siew da ka ophis jong u PIO, DMHO (EGH) sha ka ‘treasury challan’ hadien ka hukum na u Chief Information Commissioner ka Jylla.

Katkum ka aiñ RTI, ka jingpynslem ne jingkyntait ban ai jingtip sha ki RTI kan ïalam sha ka jingshah daiñ kuna ïa ka tnad kaba don bynta ban kyntait ne pynslem. Watla ha kiba bun ki khep, ki tnad treikam ki lah ban lait haba ïadei bad kane, hynrei ïa u PIO jong ka DMHO – EGH la tan noh da ka MCIC bad la bthah ïa u ban siew ïa ka kuna.

Katkum ki tyllong khubor, ïa ka jingsiew la siew ha ka 4 tarik u Nohprah, 2024 watla ym shym la pynpaw ïa kane ha katei ka por. Hynrei ïa ka dur jong ka ‘treasury challan’ la ai ban pynshisha ba la siew ïa ka kuna katkum ka jingbthah jong ka SCIC.

“Bun ki sngew ba kum kane ka jingkyntait ne jingpynslem kan ym don jingktah. Kane ka pyni shai ba ki nongtrei Sorkar kiba pyrshang ban pynjulor ïa ka jinglum jingtip ki lah ban shah pynshitom lyngba ka RTI, kan long ka jingkyrshan kaba khraw ïa kito kiba wad ban ïakhun pyrshah ïa ka bamsap ha ka rukom kaba dei,” ong u Nilbath.

Ïa ka kuna la lum hapoh ka ‘0070 – other administrative services etc; 60 other services, 118 receipt under the RTI, 2005 Vol 1 under (02) fees and fines for the penalty amount imposed by the Commission’ bad la siew ha ka 5 tarik u Nohprah.