Don ki nongïalam kiba shu leit ban pyntieng kohtympan ïa ki paidbah: Titos

U Bah Titos u la ong ba ka dei ka kamram jong ki MDC haba ki don ha ki district council ban thaw ïa ka aiñ ban ïada ïa ka khyndew ka shyiap bad ka...

Shillong, K’lyngkot 25

U Working President ka United Democratic Party (UDP) bad MDC na Sohra, Bah Titosstarwell Chyne u la ong ban long Nongïalam kam mut ban shu pyrshah beit, ban shu kdew kti beit, bad ban shu leit pyntieng kohtympan ïa ki paidbah. Ïa kane u Bah Titos u la ong ha ka jingïalang jong ka seng kaba la long ha ka Sngi Thohdieng ha Mawkynrew konstitwensi.

“Haba ngi long kita ki nongïalam kam mut ba ngin shu pyrshah beit, haba ngi long ki nongïalam kam mut ba ngin shu kdew kti beit, bad sa kawei haba ngi long ki nongïalam ngim dei ban shu leit pyntieng kohtympan ïa ki paidbah, ban shu pyni tang ïa ki jingeh, hynrei haba ngi long ki nongïalam ngi dei ban pyni ba ngi don ïa ka jingkitkhlieh kumno ban pynbeit ïa kita ki jingeh”, la ong u Nongïalam ka UDP.

U la ong ba ha kine ki sngi u ïohi ba ki don ki nongïalam kiba shu leit pyntieng ïa ki paidbah, da kaba shu ïathuh tang ïa ki jingeh khlem da ai jingmut kumno ban weng ïa kita ki jingeh.

“Nga ïohi ba ha kine ki sngi ki don ki nongïalam kiba shu leit ban pyntieng ïa ki paidbah, ban shu ïathuh tang ïa ka jingeh khlem ka jingai jingmut ban weng ïa kata ka jingeh, hynrei haba ngi long ki nongïalam ngi dei ban pyni ruh kaei ka lad ban weng ïa kita ki jingeh ban pynbit-pynbiang ïa ki jingeh ki paidbah”, u la ong.

U Bah Titos u la ong ba ka dei ka kamram jong ki MDC haba ki don ha ki district council ban thaw ïa ka aiñ ban ïada ïa ka khyndew ka shyiap bad ka riti ka dustur.

“Haba ngi don ha ki district council, haba ngi ïohi ïa ki jingeh, haba ym don ka aiñ halor ka khyndew ka shyiap ngi wanrah ïa ka, haba ngi ïohi ïa ka jingphaloh ha ka jingpynkhih ïa ka riti ka dustur, ha ka kheiñ kur kheiñ kha, ngi wanrah ïa ka aiñ ban buh ryntih ïa ka kheiñ kur kheiñ kha”, u la ong shuh shuh.

Ha kajuh ka por u Nongïalam Liang Pyrshah ha KHADC u la ong ba ha ka ilekshon kaba mynta, ka UDP ka dang don ïa ka jingsngewskhem ba kan ïalam ïa ka executive committee bathymmai. U la ong ruh ba dei tang ha kane ka samoi treikam ba mynta ba ki MDC ba jop na ka UDP kim shym phet seng.

“Man ka por phi ïohi ïa ki MDC ki kylla rong, teng-teng tang hapoh 5 snem ki kylla uniphom 3-4 tylli, hynrei ha kane ka kynti ym don uwei ruh uba phet seng, ar snem duna ba ngi shong ha ka Liang Pyrshah ym don uwei ruh u MDC ka UDP ban ryngkoh sha ka seng kaba synshar, namar ba ngi don ïa ki MDC kiba neh bad skhem ha ka nongrim”, ong u Nongïalam ka UDP.