
Shillong, K’lyngkot 25
Hadien ka jingsaphriang ki khubor ba na ka liang ka seng Khun Hynñiewtrep National Awakening Movement (KHNAM) kan sa pynïeng kyrtong da ka Kong Teilinia Thangkhiew na Mylliem Constituency ban ïakhun ïa ka ilekshon MDC sha ka Khasi Hills Autonomous District Council, na ka liang u Working-President ka seng, Bah Thomas Passah u la ong ba ha ka jingïapynbeit kam kaba janai bha, la sngewthuh shai ba na ka liang ka Kong Teilinia Thangkhiew ka don ha ki kam kiba kam lah satia ban ieh mynta bad ban ïakhun pat ïa ka MDC ilekshon ka ban sa long ha ka 21 tarik u Rymphang, 2025.
Kum ban shu kdew hangne, ka Kong Teilinia Thangkhiew ka dei ka MDC barim jong ka Mylliem Constituency bad kumjuh ka Shongknor barim jong ka Khasi Hills Autonomous District Council (KHADC).
Ha ka jingïoh ban ïakren bad u Bah Thomas Passah uba dei ruh kyrtong ban aireng ha ka ilekshon MDC sha ka Khasi Hills Autonomous District Council (KHADC) na Jaïaw-Mawprem Constituency, u la ong ba na ka liang ka seng wat la ka la don ïa ka jingmut ban pynïeng da ka Kong Teilinia Thangkhiew na Mylliem Constituency ha kane ka ilekshon MDC sha ka KHADC hynrei ha ka jingïakren sngewthuh lang da baroh ki nongkitkam ka seng, ka seng ka la rai ban pynïeng noh da u kpa jong ka Kong Teilinia, u Bah Pynshai Manik Syiem uba dei ruh u MLA barim ka Mylliem Constituency uba la jop lai sien ha ka ilekshon MLA.
“Na ka liang ka seng, ngi la ïa pynbeit ba i ban mihkhmat na ka KHNAM nangthie na Mylliem Constituency, un dei u Bah Pynshai Manik Syiem”, ong u Bah Thomas.