Hadien bun snem urlong ka jing- angnud ki paidbah, plie u CM ïa ka Mawhati C&RD Block

Hadien bun bun snem jong ka jingphohsniew bad jingangnud ban ïoh noh ïa la ka jong ka C&RD Block, ki paidbah jong ka Mawhati ha ka sngi Saitjaiñ ki la dap ka durkhmat kaba phuh...

Nongpoh, K’lyngkot 25

Hadien bun bun snem jong ka jingphohsniew bad jingangnud ban ïoh noh ïa la ka jong ka C&RD Block, ki paidbah jong ka Mawhati ha ka sngi Saitjaiñ ki la dap ka durkhmat kaba phuh samrkhie bad ka jingkmen kaba khraw ba katei ka kam kala urlong lyngba ka jingshimkhia jong u MLA ka thaiñ, u Bah Charles Marngar.

Ïa kane ka C&RD Block ba thymmai jong ka Mawhati konstitwensi la wan ban plie paidbah da u Conrad K Sangma, Myntri Rangbah ka jylla ha ka jingïalang kaba la pynlong ha Umsohlait, ha ka jingdon ryngkat u AT Mondal, Myntri ba dei khmih ïa ka tnat Community & Rural Development, u Bah Charles Marngar MLA ka Mawhati, u Dr Celestine Lyngdoh, MLA ka Umsning, u Abhilash Baranwal Deputy Commissioner ka Ri Bhoi nalor kiwei kiwei ki heh ophisar, ki ‘riew pawkhmat bad ki paidbah ka thaiñ.

U Myntri Rangbah ka jylla Conrad K Sangma haba ai jingkren u la pynpaw ïa ka jingainguh ïa U Blei uba la kyrkhu bad pynurlong ïa kane ka jingphohsniew bad jingangnud jong ki paidbah ka Mawhati konstitwensi ban ïoh noh ïa la ka jong ka C&RD Block bad ai khublei ruh ïa u AT Mondal, Myntri ka tnat C&RD bad khamtam eh ïa u Bah Charles Marngar ba dei lyngba ka jingshimkhia bad ka jinglenlade ka jong u ba kane ka kam kala urlong shisha.

U la ong ruh ba kum ka Sorkar Jylla, ka don ïa ka thong ban wanrah ïa ka synshar khadar kaba ïajan bad u paidbah bad ka jingplie ïa kane ka C&RD Block ka dei shibynta na kata, khnang ba ki paidbah ka thaiñ kin suk ban ïoh ïa ki skhim bad ki jingmyntoi kiba bun kiba ka Sorkar kala mang kyrpang na bynta ka jong ki.

U Conrad u la ïathuh ruh ba ka Sorkar Jylla ka don ïa ka jingthmu ban pynïoh ïa ka kor Internet sha baroh ki C&RD Block ha ka jylla lyngba ki ‘optical fibre’ ban pynsted ïa ka rukom treikam katkum kane ka juk stad teknoloji bad ban ai ïa ka jingshakri kaba janai tam sha ki paidbah jong ka jylla khamtam ha ki thaiñ nongkyndong.

Haba kren ha kane ka sngi, u Bah Charles Marngar u la pynpaw ïa ka jingsngewkmen kaba khraw halor ka jingïoh ban plie paidbah noh ïa ka Mawhati C&RD Block, kaba dei ka jingphoh sniew bad jingangnud ka jong u bad ki paidbah jong ka konstitwensi kaba la urlong shisha bad ai ka jingïaroh ïa u Conrad K Sangma ba u dei u briew ym tang uba shu kren ïa ka ktien, hynrei uba leh ruh ïa ka kam.

U la ong ruh ba ka jingplie ïa ka C&RD Block kan ïarap, pynsuk bad kyntiew ïa ka roi ka par jong ki paidbah kane ka konstitwensi kaba dang sahdien bad duna ha kiba bun ki liang. U la ong ruh jin lada um pynïasoh ïalade sha ka National People’s Party kaba lam khmat ïa ka kam synshar ha ka jylla, ka Mawhati konstitwensi kan ïai sah kumjuh bad kan nym ïoh ïa kane ka C&RD Block kaba thymmai bad shibun kiwei kiwei de ki kam pynroi tang ha kine ki khyndiat bnai kiba la dep.

Shuh shuh u la ong ruh wat lada kiba bun ki beiñ ki kynthoh halor katei ka jingleit pynïasoh ka jong u bad ka NPP, hynrei na ka liang ka jong u, kum u nongmihkhmat uba ki paidbah kila jied u hap ban lenlade ban shah kren shah kynthoh na bynta ka jingmyntoi bad ka jingbiang jong ki paidbah ka konstitwensi.