
Baghmara, K’Lyngkot 25
Ha kaei-kaei kaba lah ban wanrah ïa ka jingma kaba khraw ha ka liang ka jingshngaiñ ïa ka India, ka Garo Omniscience for Ethnic Renaissance and Awakening (GOERA), Nongalbibra Unit ka la pynpaw ïa ka jingsngewkhia halor ka jingïaid be-aiñ (jingwan buhai shnong) jong ki nongshong shnong na Bangladesh kiba la ïohi ba ki la ïaid lyngba da kaba suk sha shiliang jong ka ri India hajan ka shnong khappud jong ka Gillagora ha South West Khasi Hills (SWKH).
Ha kawei ka dur-khih ba khlem buh tarik kaba la paw pyrthei mynta, ym duna ïa ka 8 ngut ki briew, kiba la kynnoh ba ki dei na Bangladesh, la ïohi ba ki wan ïaid shapoh India ha katei ka shnong, bad ïa kane ka jingjia baroh kawei la ïoh ban ring ha ka dur-khih da uwei u nongshong shnong jong katei ka shnong uba don ka jingsngewkhia halor kane ka bynta.
Ha ka shithi sha u Myntri tnad kam pohïing ka Jylla, ka GOERA ka la pynpaw ba ka don ka jingsngewkhia kaba khraw kaba la pyni ïa ki dur-khih kiba la saphriang halor ka jingwan rung be-aiñ lyngba ka Gillagora bad ha kiwei-kiwei ki bynta jong ka Jylla, kumjuh ka jingshah kem ba dang shen jong ki poiwir na Bangladesh ha ki bor pulit ka Jylla.
Da kaba kynnoh ïa ki BSF halor ka jingbym shimkhia haba ïadei bad kane ka bynta, ka GOERA ka la kyntu ban pynkhlaiñ mardor ïa ki shipai BSF ha shilynter khappud ban tehlakam ïa ka jingwan rung be-aiñ (sha India) jong kito kiba thmu wan rung be-aiñ, ba kynthup ïa ka thaiñ Gillagora ha SWKH.
Shuh shuh ki la pynsngew halor ka jingdonkam ban pynbha ïa ka jingpeitngor, ban kynthup ïa ki CCTV lem bad ki tiar peitngor, ha kawei ka liang ka ban ïarap tehlakam shi kat dei ïa kane ka bynta, ha kajuh ka por ban dawa kem mardor bad ban phah phai biang ïa ki nongwan buhai shnong be-aiñ tang mar syn lap ïa ki.
Nalor kane, ka GOERA ka la phah tohkit pyrshah ïa ki shipai BSF kiba donkti halor ka jingbym shimkhia – kaba la ailad ïa ka jingwan rung ki poiwir be-aiñ sha kane ka ri, da kaba pynpaw ba ka dei ka kam ba ïadei bad ka jingshngaiñ jong ka ri bad ym lah ban shu iehnoh kumto ïa ka.