
Tura, K’Lyngkot 25
Ka Sangknigre Regional Unit jong ka ACHIK ka la ujor ejahar halor ka jingkynnoh bamsap bad jingbym biang ha ka jingpyntreikam ïa ka skhim JJM, Rekonanggre.
Ïa kane ka ejahar pyrshah ïa ki kontraktor bad ki ophisar ba don ka jingkitkhlieh la ujor ha ka 21 tarik Kyllalyngkot ha u Officer In-charge jong ka thanad Sangknigre.
“Katkum ka DPR, la mang ïa ka pisa kaba T. 74,07,540/- na ka bynta kane ka projek. Hynrei la lap ïa ki jingbym biang kiba la pynithuh, kaba pynmih ïa ka jingsngewkhia kaba jur halor ka jingpyndonkam bakla ïa ka pisa paidbah,” kam ka ejahar kaba la ujor da u President ka ACHIK, u Mansrang Ch Marak.
Katkum ka jingong jong u Marak, la lap ba ka jingker sawdong na bynta ka jingshngaiñ jong ka ‘Zonal Reservoir’ ka la jah rngai watla la ai jingmynjur ïa ka pisa kaba T.9,32,150/- na ka bynta kane kajuh. U Marak u la bynrap ba ka RCC Ringwell, kaba thmu ban shna haduh 12 mitar ka jingjylliew ka don tang kumba 3 mitar eiei ka jingjylliew, ha kawei ka liang kaba la pynlong ïa ka jingduna um sha katei ka shnong.
U Marak u la kynnoh ruh ba ym shym la shna ïa ka surok ban leit sha katei ka jaka da u kontraktor ba dei peit watla la dep ban mynjur ïa ka pisa kaba T.94,200.
Haba kdew ba ki jingbym biang ki pynpaw ym tang ïa ka jingpyndonkam bakla ha ka liang ka pisa-tyngka hynrei ki pynduh ruh ïa ka jingshaniah jong ki paidbah bad buh jingma ïa ki jingmyntoi ba la thmu jong ka projek na ka bynta ki nongshong shnong, u Marak u la dawa tohkit ïa kane ka kam kumjuh ban leh da ka aiñ pyrshah ïa ki kontraktor bad ki ophisar kiba donkti ha kane ka liang.
Ka kopi jong ka jubab RTI, ka DPR bad kumjuh ki dur ki dar bad kiwei-kiwei ki sakhi, kiba pynpaw ïa ki jingbym biang la bsut lang bad ka ejahar.