Shillong, K’lyngkot 27
Ha ka jingjia pluh ding ha thaiñ Mawlat, kawei ka ïing ha shnong Umblai kaba hap ha Mawkynrew Block, East Khasi Hills District ka la shah bam duh ha ka ding kaba klang bad bam duh ïa baroh ki jingdon jingem ha kane ka ïing.
Hynrei ym shym la don mano-mano ba mynsaw ha kane ka jingjia.
Kane ka jingjia ka la jia ha ka Lah Sngi U Blei ha ka por 3 baje eiei janmiet. Kane ka ïing kaba ngat ha kane ka apot la long trai da ka Kong Krumila Kshiar.
Haba ïakren bad u Chairman ka Synjuk ki Rangbah Shnong Mawlat Area, Bah Maron Suting, u la ong ba ki nongshong shnong ka shnong Umblai ki la pyrshang lut ki lad ki lynti kumno ban tem ïa ka ding kaba klang hynrei ym shym la lah shuh ban pynlip bad ka ding ka la bam duh ïa baroh ki jingdon jingem.
U la ong ym lah satia ban tip na kano ka daw bad kumno kane ka ïing ka kem ding, namar ki nongshong ruh ki ïa mih paidbah ban leit ïarap tang ynda haba ïoh jingtip ba ka ding ka la sdang ban klang.
U Bah Maron u la ong namar ka ïing ka dei kaba sop da ka tin bad pynïeng da ki dieng, ka ding ka sted bha ban pur khamtam ha kum kane ka por ba ka mariang ka kham tyrkhong.
Na ka liang ka Kong Sturian Kshiar kaba dei ka khun jong ka Kong Krumila Kshiar, ka la kyrpad ïa ki bor ba halor kum u MLA, MDC, BDO ka Mawkynrew Block bad ki nongtrei mon sngewbha ban ïarap lem namarba kim ïoh eiei shuh ïa ki jingdon jingem namar ka ding ka la bam duh.
U Bah Maron u la ong ba na ka liang ka Synjuk ki Rangbah Shnong Mawlat Area ruh ka pynpaw ka jingsngewlem bad jingsngewsih kaba khraw namar kane ka jingjia ha kaba la duh ei ïa ka ïing ha ka por bym poi pyrkhat.
