Nongstoiñ, K’lyngkot 27
Ha ka 27 tarik mynta u bnai da ki phew ngut ki dkhot kiba long ruh ki ‘primary member’ jong ka Voice of the People Party (VPP) Nongstoiñ Konstitwensi ki la phet bad iehnoh noh ïa ka jinglong dkhot jong ki na ka VPP ïa kaba la kam ba ka dei namar ka jingbym ihun shuh ïa ka rukom treikam jong ka seng.
Ïa katei ka rai, na ka liang kitei ki dkhot jong ka VPP la shim ha ka jingïakynduh lang kaba la pynlong ha Free Morning School New Nongstoiñ hadien ka jingphylliew jingmut para ma ki, haba ïadei bad ka jingbym hun namar ka jingmih ka kynrum-kynram ha ka VPP Nongstoiñ.
Haba kren sha ki lad pathai khubor u Bah Kyntiewbor Kharsohphoh uba dei u Secretary jong ka Election Committee ka VPP Nongstoiñ Konstitwensi u la pynpaw da kaba ong, “Na ka liang jong ngi ki nongkyrshan jong ka VPP Nongstoiñ naduh ka ilekshon MP ngi la ïoh ban ai ka jingkyrshan kaba pura ïa ka VPP hapoh ka Nongstoiñ, bad kaei kaba pynlong ïa ngi kum ki nongkyrshan jong ka seng ba ngin iehnoh noh ïa ka jinglong dkhot hapoh ka seng ka long ba ngim shym sngewhun ïa ka jingtreikam jong ka VPP”. U la ong ruh ba kumba la ïohi, ka jingbym pynïaid beit ïa ka tiket hapoh ka Nongstoiñ bad hadien ba la dep rai ïa ka tiket bad hadien ki kynrum-kynram kum ki dkhot bad ki nongtrei jong ka seng ki la ïoh ban leit ïakynduh ïa u President bad la ïoh ban kylli, ha kaba u President u la kren shai beit ba ha kaba ïadei bad ka jingbujli ïa u kyrtong u ban ïakhun na Nongstoiñ Konstitwensi un shim beit ïa kiba la aplai ïa ka tiket ha kane ka ilekshon MDC.
U Bah Kyntiewbor u la ong ruh, “Kaei kaba ngi shim ïa kane ka sien jam ba ngin iehnoh noh ïa ka jinglong dkhot ka long ba ka jingthok ïa ngi ki nongtrei jong ka seng hapoh ka Nongstoiñ namar ba markhmat bad ngi la ïoh ban ïakren ha kaba u la pynsngew sha ngi ba un nym pdiang shuh ïa kiba aplai thymmai hynrei ïa kata ruh u khlem leh bad khlem da kynjoh ktien ïa ka tiket la ai noh sha uwei pat u bym dei u dkhot ka VPP bad uba khlem aplai ruh ïa ka tiket”.
Kawei na ki longkmie kaba dei ruh ka dkhot ba pura jong ka VPP Nongstoiñ ka la pynpaw da kaba ong, “Nga dap da ka jingsngew lyngngoh haduh katta-katta haba ha ka ilekshon MP, la ïatrei shitom met bad mynsiem bad la ïashad ïakmen ruh haba la ïoh ïa u MP uba hun bad uba ngi la shaniah hynrei ka long kaei-kaei ka bym lah pdiang ïa ka jingleh jong u President ka VPP namar la ithuh shai ba um don satia ka jingñiew briew ïano-ïano ruh imat ka long ka jingsynshar donbor aïu re kaba ïa ka jingong lem, ka jingkren lem jongno-jongno um shym la sngap hynrei u pynksan ïa la ka jong ka nia.”
Shuh shuh ka la ong ruh ba ka jinglong jong u President ka VPP la ithuh shai ba u long ka jingsarong ka ktien kaba ïaroh ïalade ba u seng ïa ka seng kaba khuid hynrei pynban u pynlong jakhlia hi dalade bad ki nia kiba u ai ruh ki bym shongnia eiei ruh em, u shu pynksan hi ïa ka jingsngew lajong. Halor ka jingweng noh ïa u kyrtong MDC na Nongstoiñ, katei ka longkmie ka la ong ba ka la long kum ka jingleh beiñ haba ïa ka tiket la dep ai sa da knieh bad pynduh biang bad kane ka rukom leh jong u President ka VPP ka long ka jingsarong uba ïaroh tang ïalade.
Kitei ki dkhot ba la iehnoh kam na ka VPP ki la pynpaw ruh ba kim dei ki briew jongno-jongno hynrei ki dei ki briew jong ka VPP hi. Nangta, ki la ong ruh ba ïa mynta kim pat don kano-kano ka jingthmu ban leit ïasoh sha kiwei ki seng ne ban leit kyrshan ïa kino-kino ki kyrtong.
