Shillong, K’lyngkot 27
U Myntri Rangbah ka Jylla, Conrad K. Sangma ha ka Sngi U Blei u la pynher ïa ka lama ka ri kum shi bynta jong ka jingrakhe ïa ka sngi ‘Republic Day’ kaba 76 ha Tura.
Ha ka jingkren jong u, u Sangma u la batai shai halor ka lynti ïaid ka Jylla haba phai sha ka juk jong ka jingseisoh ha ka liang ka roi ka par.
U la kren bniah halor ka roi ka par kaba kynthup lang bad ka jingkyntiew ka bym shah liang kaba la ai sha ki bynta bapher-bapher jong ka Jylla.
Haba kren shaphang ka thong jong ka ïoh ka kot kaba 10 ‘billion dollar’ (US) hapoh jong u snem 2028 da kaba pynkiew ar shah ïa ka GDP jong ka Jylla, u Myntri Rangbah u la pyntip ba ka Jylla ka long ba la khreh ban pynurlong ïa ka thong bad ki jingbei tyngka kiba heh kiba dang ïaid ha ki tnad ba ïadei bad ka imlang-sahlang bad kito ha ka liang ki jingtei.
“Ka GDP jong ka Jylla jong ngi ka la kiew na ka T.23,235 klur ha u snem mang tyngka 2015 sha ka T.53,057 klur ha u snem mang tyngka 2024. Ki bynta ba kongsan kum ki surok, ki ïing ki sem, ka jingpynbiang um, ka bording, ka kam jngohkai pyrthei, bad ka IT ki pyntyllun ïa ki kam ba ïadei bad ka jingkiew shaphrang. Ha kine ki san snem ba la dep, ka Jylla ka la shna palat 2,500 km ki surok hapoh ka PMGSY. Ka Sorkar ka dang ïaid shakhmat bad ka kam ban pynheh ïa ka Kad Liengsuiñ jong ka Shillong khnang ban lah ha ka ban pdiang ïa ki liengsuiñ kiba kham heh bad ban pynbha ïa ki lad pynïasoh”, u la ong.
Halor ka jingpynbha ïa ki surok jong ka Jylla, u la ong, “Ha kine ki ar snem ba la dep, ka Sorkar ka la mang ïa ki jingpyntrei surok kiba heh haduh 568 kilomitar, ban pynbha ïa ki lad pynïasoh hapoh ka Jylla. Ka jingpyntrei ïa ka surokbah Shillong- Dawki bad ka surok Tura- Dalu ka la ïaid shakhmat, bad la mynjur ïa ka jingpynbeit thymmai na ka bynta ka surok Pynursla ‘By-pass’. Ki projek kum ka Shillong Western ‘By-pass’, bad kawei pat – ‘High-speed Corridor’ na Mawlyngkhung sha Panchgram ruh ki dang ïaid shakhmat,” u la pyntip.
U la ong ruh ba lyngba ki projek ba la ïarap nabar, la wanrah ïa ka jingtei surok ha ka thaiñ kaba jrong haduh 500 km.
“Ka surok Garobadha-Dalu, Pasyih-Garampani, Umling-Patharkhmah, bad ka surok Umsning-Jagiroad, ki thmu ban pynbha ïa ka jingpynïasoh surok ha baroh ki thaiñ jong ka Jylla. Da kaba pynshong nongrim ïa ka jingtreikam bha jong ka Jylla ha ka liang ki lynti ki syngkieñ, ka Sorkar India, dang shen ka la mynjur ïa ka ‘Mega Project’ na ka bynta ban pynbha ïa ki surok da kaba bei tyngka haduh T.2500 klur. Hapoh kane ka projek, yn shna palat 300 km ïa ki ‘double-lane’ kiba lah ban ïakhun pyrshah ïa ka jingkylla suiñbneng bad kane kan ïarap ban pynurlong ïa ka ‘Mission 10’ jong ngi”, la bynrap u Myntri Rangbah.
