
Shillong, K’lyngkot 28
Ka jingthep kyrteng ki kyrtong ban ïakhun ïa ka ilekshon MDC ka la sdang naduh ka 27 tarik mynta u bnai. Ha ka sngi kaba ar ki la don hynriew ngut ki kyrtong kiba la poi ban pyndep ïa ka jingthep kyrteng na ka bynta ka ilekshon sha KHADC.
Ha kane ka sngi, kiba la poi thep kyrteng kata ha East Khasi Hills ki kynthup ïa saw ngut ki kyrtong, ar ngut na ka KHNAM, uwei na ka HSPDP bad uwei u kyrtong shimet, katba sha West Khasi Hills pat ki la don ar ngut, uwei na ka NPP bad uwei u kyrtong shimet.
Haba phai sha East Khasi Hills, ki saw ngut kiba la pyndep ïa ka jingthep kyrteng ha ka shlem treikam jong ka Deputy Commissioner ki kynthup ïa ar ngut ki kyrtong ka KHNAM, u Bah Joseph H Pyngrope ban ïakhun na Sohryngkham Konstitwensi bad u Bah Peter Shallam na Laitumkhrah-Malki Konstitwensi. U kyrtong ka HSPDP dei u Bah Starfing Jove Langpen Pdahkasiej ban ïakhun na Mawsynram Konstitwensi bad uwei pat uba la dep thep kyrteng dei u Bah Kris Kharsati ban ïakhun kum kyrtong shimet na Sohryngkham Konstitwensi.
Katba ar ngut ki kyrtong kiba la thep kyrteng sha West Khasi Hills ki long u Bah Kimfa S Marbaniang jong ka NPP ban ïakhun na Rambrai-Jyrngam Konstitwensi bad u Bah Lurshai Kharbani kum kyrtong shimet na Rambrai-Jyrngam Konstitwensi.
Kumba ka long haduh ka sngi kaba ar, ki la don haduh khyndai ngut kiba la pyndep ïa ka jingthep kyrteng bad la khmih lynti ba ha kine ki sngi ban wan kin sa nang bun shuh shuh. La thikna ba kin poi da ki spah ngut ki kyrtong ban pyndep ka jingthep kyrteng ban ïakhun sha 29 tylli ki konstitwensi ha KHADC bad 29 tylli ki konstitwensi ha JHADC.