Bteng ki kali kit skum ban pynkheiñ kyndon, khlem suitñiew ïa ka jingbthah ki bor district

La mana ruh ïa ki kali kit skum kiba ju ïaid lyngba ka surok Mawtawar-Mawsiatkhnam bad wan rung sha kylleng ki jaka ha nongbah Shillong

Shillong, K’lyngkot 28

Wat lada ki bor district ki la pynmih hukum ban mana ïa ki kali kit skum ba ki dei ban tap bha ïa u skum bad ym dei ban kit palat pud, hynrei bun ki kali kit skum ki bym suitñiew ïa kane ka jingbthah.

La ïohi ba bun ki kali kit skum ki dang ïaid ha surokbah bad surok shnong khlem tap tyrpa ïa ka kali baroh kawei ha kaba u skum u la her bad hap ha ki surok shnong khamtam haba beh ka lyer.

Ka jingïaid ki kali kit skum khlem da tap ïa ka kali ka pyni ba kim suitñiew ïa ka jingkyrpad jong ki nongpynïaid shnong khamtam haba la pynmih hukum da ki bor district. Dang shen, na ka liang ki nongkitkam shnong ha Mawlai ki la kyrpad ïa baroh ki kali kit skum ban phikir bha haba ki ïaid ha surok shnong khamtam ban tap bha ïa u skum uba la thep ha kali.

Nangta, ki bor pynïaid district ka East Khasi Hills ha ka 19 tarik Nohprah 2024 lyngba ka hukum ba la pynmih da ka Deputy Commissioner, la mana ïa ki kali kit skum ban ym kit palat pud bad la bthah ruh ba ki kali kit skum ki dei ban tap bha da ka tyrpa ïa ka kali haba kit skum.

La mana ruh ïa ki kali kit skum kiba ju ïaid lyngba ka surok Mawtawar-Mawsiatkhnam bad wan rung sha kylleng ki jaka ha nongbah Shillong

Kane ka jingmana ka dei na ka bynta ka jingshngaiñ jong ki nongshong shnong khnang ba ka kali kit skum kan ym kyrshut bad ki sainar ilektrik kaba buh jingma ïa ki nongshong shnong kiba ïaid lynti lada jia ba ka kali kit skum ka kemding.