Shillong, K’lyngkot 28
Ka Voice of the People Party (VPP) ka la kyntu ïa ka Sorkar Jylla ban pynmih ïa ka jingbthah sha baroh ki Dorbar Shnong ban kiar na kaba shim ïa ki sienjam kiba lah ban khanglad ne pynwit ha ka ban ïoh ïa ka ilekshon kaba laitluid bad kaba khuid ba suba.
“Ka rai jong katto-katne ki Nongsynshar Shnong/Rangbah Shnong/Sordar Shnong Dorbar ka la dep ban pynduh be-aiñ ïa ka VPP bad ïa ki kyrtong jong ka ban pynlong ïa ki jingïalang paidbah,” ong u MP bad General Secretary ka VPP, Dr. Ricky A.J. Syngkon ha ka shithi ba la phah sha u Commissioner & Secretary ka tnad District Council Affairs (DCA) ha ka Sngi Ba-ar.
“Kumta nga kyrpad ïa phi ba phin pynmih ïa ka jingbthah kyllum sha baroh ki Nongsynshar Shnong/-Rangbah Shnong/Sordar Shnong Dorbar ban kiar na kaba shim ïa kino-kino ki sienjam kiba khanglad ne pynwit haba ïadei bad ka jingpynïaid ïa ka ilekshon kaba laitluid bad kaba khuid ba suba kaba donkam ïa ki ban pynsuk ïa ki seng saiñ pyrthei bad ki kyrtong ban pynlong ïa ki jingïalang jong ki da kaba ai ïa ka ‘No Objection Certificate’ (NOC) hapoh ka por ba la buh naduh ba la pdiang ïa ka aplikeshon, la ka long ha ka por ba pyntreikam ïa ka ‘Model Code of Conduct’ ne ha kiwei pat ki rukom,” u la ong.
Na ka liang u Dr. Syngkon u la pynpaw ba u la ïoh jingtip ba ki la don ki khep ha kaba ki kyrtong ka seng ki ïakynduh jingeh ban ïoh jingbit na bynta ban pynlong ïa ki jingïalang paidbah/jingïalap, na ka ophis jong ki Nongsynshar Shnong/Rangbah Shnong/Sordar Shnong jong ki distrik hapoh Ri-lum Khasi bad Jaiñtia.
“Ïa ka jingbit kaba la pan ym shym la pynleit jingmut ne la ai hadien ka jingpynslem kaba khraw – kaba ktah pat ïa ki jingïalap ilekshon jong ngi. Ki kyrtong jong ngi ki la shem ba ki don ki Dorbar Shnong kiba khanglad ïa ka jingïalang paidbah lait noh ka jingleit lang ha kajuh rynsan ne ‘Common Platform’ kaba la pynlong da ma ki,” u la ong.
Haba kdew ba kitei ki jingleh jong katto-katne ki Nongsynshar Shnong/Rangbah Shnong/Sordar Shnong ka la ktah jur ïa ki hok ba kongsan ba la shon ha ka Riti Synshar ka ri India, u MP u la ong, “Ngi ki dkhot jong ka seng la ka long marwei-marwei ne kum ka kynhun ngi don ka hok ban pyndonkam ïa kine ki hok ba kongsan kumba la pynskhem da ka Riti Synshar katkum ka Article 19 (1) – ka jinglaitluid ban kren bad pynpaw pyrthei, ka jinglaitluid ban ïalum lang ha ka jingsuk khlem ki tiar ïaleh bad ka jingïaid laitluid ha kylleng ki jaka jong ka ri India.”
Shuh shuh u la bynrap ba ki kyrtong bad ki seng saiñ pyrthei ki long ki nongshim bynta kiba kongsan ha ka rukom jied nongmihkhmat bad ym tang ba ki don ïa ka hok, hynrei ki mihkhmat ruh ïa ki jingmut bad ki sur saiñ pyrthei jong ki nongthep ‘vote’.
“Ka jingpynpoi laitluid ïa ki jingtip bad ki jingmut da ki nongthep ‘vote’, ki kyrtong bad ki seng saiñ pyrthei ka long kaba donkam na ka bynta ka ilekshon kaba shisha. Ban kynjoh ïa kane, baroh, kynthup ïa ki seng saiñ pyrthei, ki kyrtong, bad ki nongkyrshan jong ki, ki don ka hok ban wad, pdiang, bad ai jingmut lyngba kino-kino ki lad kaba ki jied kynthup ïa ki jingïalang paidbah,” ong ka shithi na u General Secretary ka seng.
