Shillong, K’lyngkot 28
Ka ïingbishar Meghalaya High Court ka la ai byrta ban bishar ‘Contempt of Court’ ïa ki san ngut nongpynïaid jong ka Don Bosco Technical School, Shillong namar ka jingpynpra ïa ka ïingskul jong ka St. Anthony’s LP School ha shuwa ban shim rai da ka ïingbishar.
Ki bor pynïaid jong ka Don Bosco Technical School, Shillong kiba la shah ai byrta ki kynthup ïa u Sagi Stephen Parappilly, Arcadius Puwein, Edmund Gomes, Dianetius Fernandez bad Cyril Tirkey.
Haba pynmih ïa ka hukum ha ka Sngi Ba-ar hadien ba la shong bishar ïa ka PIL, ka ïingbishar ba kynthup ïa u Chief Justice IP Mukerji bad u Justice W Diengdoh ki la ong, “Ha shuwa ban shim rai ïa kiwei ki kam jong kane ka kam, ngi bthah ban ai byrta hapoh ka Contempt of Court (High Court of Meghalaya) Rules, 2013 sha kitei san ngut ki bor pynïaid ka Don Bosco Technical School Shillong, Shillong -793003, East Khasi Hills District, Meghalaya, ban pynphai pat ha ka 24 tarik Rymphang, 2025 ban pynshai balei ba kim dei ban shah pynshitom namar ka jingleh pyrshah ïa kane ka ïingbishar da kaba ïadonlang ha ka sien shong bishar ba nyngkong jong ka ïingbishar”.
Ka ïingbishar ha ka hukum ba 9 tarik Nohprah 2024, ka la bthah ïa ka Sorkar Jylla ban leit jurip bad pynlong ïa ka jingtohkit hapoh ka Meghalaya Heritage Act, 2012 bad ban aiti ïa ka kaiphod sha ka ïingbishar halor ka jinglong kongsan kane ka jingtei barim.
Ka kaiphod ba la aiti da u AAG K Khan ka pyntip ba ïa ka jingjurip bad jingtohkit la leh ha ka 16 tarik Nohprah, 2024 hapoh kane ka aiñ bad la shem ba ka jingtei ka dang don kumba ka long. Hynrei hynne la pyntip da u nongïasaid aiñ jong ka skul ba ïa kane ka ïing skul la dep ban pynpra noh.
“Ban khanglad ïa ka jingleh pyrshah biang ïa ka ïingbishar ne nang pynheh shuh shuh ïa ka jingïaleh pyrshah, ngi bthah ba ym dei ban leh eiei shuh haba ïadei bad ka jingpynpra, jingshna ne pynkylla ïa ka ïing skul kaba la don lypa tad haduh da pynmih hukum kane ka ïingbishar,” ong ka hukum na ka ïingbishar.
Ka ïingbishar ka la bthah ruh ïa ki pulit ba kin pynthikna ba ki bor pynïaid ka DBTS kin pyntreikam ïa kane ka hukum.
