La khang ïa ki prokram ïakhih ha EKH

Ki bor distrik ki la khang pyrshah ïa kino-kino ki jait prokram ïakhih da kino-kino ki 'riewshimet ne ki seng hapoh East Khasi Hills District.

Shillong, K’lyngkot 28

Ki bor distrik ki la khang pyrshah ïa kino-kino ki jait prokram ïakhih da kino-kino ki ‘riewshimet ne ki seng hapoh East Khasi Hills District.

“Katba, u Lat ka Jylla u la pynbna na ka bynta ka jingpynlong ïa ka ilekshon sha ka KHADC-2025, ka ban long ha ka Jylla ha ka 21 tarik u Rymphang, 2025 bad katba ka ‘Model Code of Conduct’ bad kiwei-kiwei ki jingbthah jong ka tnad District Council Affairs (DCA) ki la treikam ha ka Jylla hadien kaba kum kane ka jingpynbna, la ïoh jingtip ba ki prokram ïakhih kum ka jingshah thngan, ka jingïaid proseshon, ka jingïalang paidbah, bad kiwei-kiwei la pynlong da katto-katne ki seng ha ka distrik,” ong ka Deputy Commissioner ka East Khasi Hills, Kong R.M. Kurbah ha ka hukum ba la pynmih ha ka 27 tarik mynta u bnai.

Ka DC ka la ong ruh ba kum kine ki prokram ïakhih lada pynlong, ka lah ban wanrah ïa ka jingeh ha ka liang ka shongsuk shongsaiñ, ka jingpynthut ïa ka suk ka saiñ ka ban ktah ïa ka jingïaid beit ïaid ryntih jong ka ilekshon sha ka KHADC-2025, lada ym khang mardor ïa ki.

“Kumta namarkata, ha ka jingpyndonkam ïa ki bor ba la pynkup ha nga katkum ka kyndon 163 BNSS la khang pyrshah ïa kino-kino ki jait prokram ïakhih ha kano-kano ka rukom, da kino-kino ki ‘riewshimet ne ki seng ha East Khasi Hills,” ong ka Kong Kurbah.

Kane ka hukum kan treikam mardor bad kan treikam haduh ban da mih kiwei pat ki hukum.