
Shillong, K’lyngkot 28
U Nongbishar ba la shongthait, Justice (Retd) B.K. Katakey u la bthah ban aiti ïa ka kaiphot jong ka sorjamin ba la leh na suiñ halor ka jingdon jong u dewïong bad ïa ka jingtih dewïong beaiñ, bad ïa kane ka kaiphot la buh por ban aiti ha ka 28 tarik Rymphang ban wan.
U Justice Katakey uba dei u dkhot ba marwei jong ka committee ba la thung da ka kashari Meghalaya High Court, ha ka Sngi Ba-ar u la lum ïa ka jingïalang bad ka tnat Mining jong ka Jylla.
U Katakey u la shong ruh ïa kum kane ka jingïalang ha u Naiwieng 2024, bad hadien katei ka jingïalang u la aiti ïa ka kaiphot ba pura sha ka High Court.
Ïa kane ka committee la thaw hapoh ka Public Interest Litigation (PIL) na ka bynta ban bishar bniah ïa ki sienjam ka Sorkar halor ka jingpyntreikam ïa ka hukum jong ka kashari ba ha khlieh duh ka Supreme Court, kaba la bthah ïa ka Sorkar Jylla ban pynsangeh ïa ka jingtih dewïong beaiñ.
Haba kren bad ki lad pathai khubor, u Justice Katakey u la ong ba haduh mynta ka jingïoh kurup ïa u dewïong beaiñ ka dang don ha South Garo Hills, hynrei ha kiwei ki district kam don eiei katkum ka kaiphot na ki Deputy Commissioner naduh u Naiwieng mynshem snem haduh u Kyllalyngkot mynta u snem.
“Nga la pan ïa ka kaiphot na ki Deputy Commissioner, na South Garo Hills la ïoh kurup 2500 metric ton u dewïong ha u Nohprah, kiwei pat ki district ym shym la ïoh kurup eiei. Ka jingïai peit pyrman ka dang bteng”, la ong u Katakey.
U la ïathuh ba ïa kane ka kaiphot ba u la ïoh un sa phah sha ka High Court bad ka shong ha ka High Court ban leh ïa kaba donkam.
U la ïathuh ruh ba u la bthah ban sorjamin na suiñ ban tip ïa ka jingdon u dewïong bad ka jingtih dewïong beaiñ ha baroh ki district lait noh ha South West Khasi Hills ba la aiti sha ka MBDA ban leh sorjamin ha ki hynriew tylli ki jaka bad kan aiti ïa ka kaiphot ha ka Sngi Thohdieng ban wan.
U Justice Katakey u la pyntip ruh ba u la ïoh hynñiew tylli ki jingujor halor ka jingtih dewïong beaiñ bad ka jingkit beaiñ ïa u dewïong, kynthup na South Garo Hills bad West Khasi Hills. Halor kane u la bthah ïa ka tnat Mining ban kyrpad da ka jingthoh ba kin wan ïathuh ryngkat ki sakhi ban pynskhem ïa ka jingtohkit.
Kawei ka jingujor ka dei kaba la ïoh ha East Jaiñtia Hills ryngkat bad ki dur khih (video) ïa kiba la phah sha u Chief Secretary, bad la bthah ruh ïa u Deputy Commissioner ban tohkit bad ban phah ïa ka kaiphot ha ka Sngi Balang.
Halor ka jingïoh dewïong ki karkhana pynmih dewbilat, la bthah ban aiti ïa ka kaiphot hapoh artaïew.