Shillong, K’lyngkot 28
Kawei ka khynnah skul jong kawei ka skul kaba don ha nongbah Shillong, ka la pynkut noh ïa la ka jingim ha u tyllai phasi ha ka 24 tarik u Kyllalyngkot, 2025.
Haba wad jingtip halor kane ka jingjia, katei ka khynnah ka dei kaba dang shong klas 11 bad kaba dang don hapoh ka 18 snem ka rta, bad kane ka khynnah ka dei ruh kaba la leit ha katei ka skul naduh ba ka dangrit.
La ïathuh ruh ba katei ka khynnah ka la pyndonkam da u tyllai ban phasi ïalade hapoh kawei ka kamra klas jong ka klas 11 Arts.
Ïa katei ka jingjia la lap da ki bor pynïaid skul hadien ka jingwan wad jong ki bahaïing-baha-sem jong katei ka khynnah sha skul namar ba ka khlem wanphai shuh sha la ïing naduh ba ka leit skul mynstep bad ïa katei ka jingjia la lap ha ka por janmiet jong katei kajuh ka sngi.
Na ka liang U Nongsaiñ Hima haba pyrshang ban phone ïa i Principal jong katei ka skul ban kylli kham bniah shuh shuh halor kane ka jingjia hynrei khlem ïoh satia ban ïakren.
Ïa ka daw tynrai ba la pynlong ïa katei ka samla lud ban shim noh ïa la ka jingim ym pat lah satia ban tip hynrei ka jingtohkit ka dang ïaid shakhmat.
