Nongstoiñ, K’lyngkot 28
Ha ka 28 tarik u Kyllalyngkot, 2025, ar ngut ki kyrtong ban ïakhun ïa ka ilekshon MDC na ka 28 Rambrai Jyrngam District Council Konstitwensi ki la leit ban pyndep ïa ka jingthep kyrteng hakhmat u Returning Officer.
Kine ar ngut ki kynthup ïa u Bah Kimfa Marbaniang kum u kyrtong ka NPP bad u Bah Lurshai Kharbani kum u kyrtong shimet.
Ha katei ka sngi ïa u kyrtong ka NPP u Bah Kimfa la synran lang da katto-katne ki nongkitkam bad ki nongkyrshan ka NPP Rambrai, katba ïa u Bah Lurshai la synran lang da u MLA ka Rambrai Jyrngam u RG Momin ha ryngkat lang bad ki spah ngut ki paidbah nongkyrshan.
U Bah Lurshai Kharbani haba kren bad ki lad pathai khubor hadien ba la pyndep ïa ka jingleit thep kyrteng u la ong, ka jingpynlong ïa u ba un mih shakhmat ban ïakhun ka dei ba ki nongkyrshan ki kwah ïa u ban long u kyrtong.
“Hooid la don uwei na ki rangbah na Rambrai ha ka jingshisha ba un long u kyrtong hynrei ki nongïalam, ki nongkitkam kim ïa mon ïa u kumta la mih bujli noh da ma nga,” ong u Bah Lurshai.
U la ong ruh ka thong kaba hakhmat eh ka jong u lada u poi sha ka thong, ka long ba u kwah ban pynneh pynsah ïa ka khyndew ka shyiap khamtam ïa u pud u sam. Nangta u la ong ruh ba na ka liang jong u bad u MLA ki kwah ban ïatrei ryngkat khnang ba yn ïoh jingmyntoi ïa ka konstitwensi hi baroh kawei.
Nalor kane, u la ong ruh ba kumba long u MLA uba la jop na ka kynhun kum u kyrtong shimet, kumta na ka liang jong u ruh u kwah ban ïakhun hi na kajuh ka kynhun jong u MLA, ha kaba u la bynrap ruh da kaba ong “Ngi jop na ka Independent, ki paidbah ki ieit ïa ngi, ki la jied ïa u MLA na ka kynhun Independent nga ruh mynta ngam kwah ban kynriah ïa ka nongrim bad nga ruh nga kwah ban ïakhun kum u kyrtong shimet na ka kynhun jong u MLA khnang ba lada ngi jop ka suk ïa ngi ban treikam”.
U Bah Lurshai u la kob bad kam ruh ba ka jingïakhun na Rambrai lehse ma u, u la don lypa ha ka bynta jong ka jingjop katba kiwei ki kyrtong ki ban ïakhun kin wan ba-ar.
U la ong ruh ba u don ka jingkyrmen kaba skhem bha namar ha ka ilekshon MLA kaba la dep ka vote la ïoh 9057 bad ngeit skhem ba mynta yn lah ban ïoh ar shah ïa kata.
Katba u Bah Kimfa Marbaniang kyrtong ka NPP pat u la ong ba ka jingphai biang ka jong u ban ïakhun ïa ka ilekshon MDC ka dei ka jingkwah ka jong u paidbah kaba ki la thrang ba u dei ban ïaid shakhmat.
U la ong ruh kaba ar ka dei hadien ka jingwanrah ïa ki ar tylli ki block naduh u la pynïasoh bad ka NPP, bad kane kam dei ba u shu kwah phet seng, hynrei u kwah ban wanrah hok ïa kata ka jingdonkam ki paidbah. U la bynrap ruh da kaba ong “Ngi la aiti na ka bynta ka jingmyntoi jong ka dong ka thaiñ hynrei ha ka ilekshon MLA ka la shu long kumto”.
U Bah Kimfa u la ïathuh ruh ba mynta hadien ba u la ïaid sharum-shaneng u ïohi ba u paidbah u shah lehbeiñ bha bad u don kata ka jingangnud kumba ma u, u angnud, dei na kata ka daw ba wat la ka dei tang ka kam MDC hynrei ka jingïohi ka jong u ka long ba ki don ha ka Sorkar bad ka don ka lad ka lynti lada poi sha ka thong ban ïarap ïa ki paidbah.
