Nongpoh, K’lyngkot 28
U District Magistrate (DM) jong ka Ri Bhoi District katkum ka bor kaba la pynkup ha u lyngba ka Section 163 jong ka aiñ Bharatiya Nagarik Suraksha Sanhita (BNSS), 2023 u la pynmih ïa ka hukum ban mana ïa ki trai jaka ba kim dei satia ban pynthut ïa ka jingpyntrei ïa ka surok Shillong Western Bypass.
Katkum ka kyrwoh, la ïathuh ba ka jingpynmih ïa kane ka hukum ka dei ruh hadien ba ki bor ba dei khmih jong ka NHIDCL-PMU Mylliem, East Khasi Hills ki la ujor ba ki la don ki trai jaka ha ka shnong Nongkyndong, Ri Bhoi District ki bym shah ban pyntrei ïa katei ka surok Shillong Western Bypass wat hadien ba ka Sorkar ka la dep ban siew bailutksan ïa ki jaka-puta jong ki.
Halor kane ka bynta, u District Magistrate ka Ri Bhoi u la maham ba kino-kino ki briew kiba ïaleh pyrshah ïa kane ka hukum, kin ngat ha ka jingshah pynshitom katkum ka Section 223 jong ka Bharatiya Nyaya Sanhita (BNS) 2023 bad ba kane ka hukum kan treikam mardor tad haduh ba la pynbna da kumwei pat.
