Shillong, K’lyngkot 29
U kyrtong ka Congress Bah Jonathan Syiem ban aireng na ka Sohryngkham Konstitwensi u la ong ka jingjied ka jong u ïa ka Congress, namar ka dei kane ka seng kaba la wanrah ïa ka Khyrnit Hynriew ne 6th Schedule bad kaba la pynïoh ïa ka jylla Meghalaya.
Haba kren sha ki lad pathai khubor hadien ba la pyndep ïa ka jingthep kyrteng ha shlem treikam jong ka DC ka East Khasi Hills, u Bah Jonathan u la ong kum u samla u don ïa ka jingkitkhlieh ban kit bad bah ïa ka lyngkor jong ka jaidbynriew bad ong ruh ba ka nongrim kaba u ïeng ka long ban ïada ïa ka riti ka dustur jong u Khasi.
“Ka Congress ka dei ka trai bad ka kmie jong ka Jylla bad ka Ri India hi baroh kawei khamtam hapoh ka konstitwensi jong ngi,” ong u Bah Jonathan.
Shuh-shuh u la ong, lada u wan ha ka bor un wanrah da kawei ka aiñ ha ka jaka jong ka aiñ ‘Building by Laws’ jong ka District Council namar ba kane ka aiñ ba mynta ka ktah shisha ïa ka konstitwensi jong u, kumta u la ong ba ka donkam ban pynkupbor noh ïa ki Rangbah Shnong ruh ban peit lang ïa ka Building by Laws.
U la ong ruh ba na ka liang jong u lada ka seng ka wan ha ka bor hapoh ka District Council, kan buddien ïa ka 125 Amendment ban kynthup lang ïa ka Khyrnit ba hynriew hapoh kane ka aiñ bad u la ong ba kaba donkam ka long ruh ba ka District Council kan ïoh noh ïa ka ‘Direct Funding’ ne ka jingbei tyngka kaba wan beit lyngba na ka Sorkar Kmie ym ba kan wan shwa lyngba ka Sorkar Jylla.
Shuh-shuh, u la ong ba ka donkam ruh ban pynkhlaiñ ïa ka pla tyngka hapoh ki District Council khnang ba kan lait shah ktah ha kiba bun ki liang.
