Shillong, K’lyngkot 29
Ka Mawlai konstitwensi kaba dei kaba bun eh ki nongthep vote ha ka ilekshon MLA ka dei ruh kaba bun eh ki nongthep vote ha kane ka ilekshon MDC napdeng 29 tylli ki konstitwensi kiba hap ha Khasi Hills Autonomous District Council (KHADC).
Ha Jaiñtia Hills Autonomous District Council (JHADC) pat, ka konstitwensi kaba bun eh ki nongthep vote ka dei ka Muthlong-Sohkymphor konstitwensi napdeng 29 tylli ki konstitwensi.
Ha Mawlai konstiwensi ki nongthep vote ki la jan kot 50 hajar ngut kata, 49,841 ngut kiba kynthup 22,843 ngut ki shynrang bad 26,998 ngut ki kynthei.
Ka konstitwensi ha KHADC kaba rit bad duna nongthep eh ka dei ka Laban-Mawprem konstitwensi kaba don tang 16,564 ngut ki nongthep vote ha kaba 7,243 ngut ki dei ki shynrang bad 9,321 ngut ki kynthei.
Ha JHADC, ka Muthlong-Sohkymphor konstitwensi ka dei kaba heh bad bun eh ki nongthep vote kaba don 14,167 ngut kiba kynthup 6,718 ngut ki shynrang, bad 7,449 ngut ki kynthei.
Ka konstitwensi kaba duna eh ki nongthep vote ha JHADC ka dei ka Sumer konstitwensi kaba don tang 8,305 ngut ki nongthep vote kiba kynthup 4,129 ngut ki shynrang bad 4,176 ngut ki kynthei.
Ki don palat 13 lak ngut ki nongthep vote ha kane ka ilekshon sha ka Ïingdorbar KHADC bad JHADC ha ka jingthep vote ka ban long ha ka 21 tarik Rymphang.
Katkum ka thup kyrteng ki nongthep vote ha baroh ar tylli ki District Council kaba la pyllait ha ka 27 tarik mynta u bnai, la pyni ba baroh ki nongthep vote ki don 13,08,818 ngut kiba kynthup 6,32,347 ngut ki shynrang bad 6,76,467 ngut ki kynthei.
Ka KHADC kaba don 29 tylli ki konstitwensi ka don 9,96,518 ngut ki nongthep vote kiba kynthup 4,81,268 ngut ki shynrang bad 5,15,247 ngut ki kynthei.
Ka JHADC ruh ka don 29 tylli ki konstitwensi tangba ka kham rit ban ïa ki konstitwensi kiba don ha KHADC. Ka JHADC ka don 3,12,300 ngut ki nongthep vote ha kaba 1,51,079 ngut ki dei ki shynrang bad 1,61,220 ngut ki kynthei.
Ki don ruh 4 ngut ki nongthep vote bym dei kynthei shynrang ha kaba 3 ngut ki dei na KHADC bad 1 na JHADC. Ka jingthep kyrteng na ka bynta ki kyrtong kan kut ha ka 3 tarik Rymphang haduh ka por 3 baje janmiet, bad ka jingpeit bniah ïa ki kot ki sla jong ki kyrtong ka dei ha kane hi kajuh ka sngi hadien ka 3 baje janmiet.
Ka tarik bakhatduh ban weng kyrteng ki kyrtong ka dei ha ka 4 tarik Rymphang bad ka sngi ban rai bad pynmih ïa ki kot ki sla jong ki kyrtong kiba biang lut ki kot ki sla bad ka jingaiti ïa ka shap jong ki kyrtong kan long ha ka 6 tarik Rymphang. Ka jingthep vote kan long ha ka 21 tarik Rymphang naduh 7 baje mynstep haduh 4 baje janmiet bad ka jingñiew ïa ki vote ha baroh ar tylli ki District Council kan long ha ka 24 tarik Rymphang.
