Ka District Council ka dei ka kynroh ba khatduh ban ïada ïa ka jaidbynriew; ap jingma lada khyllem : Thomas

"Kine ki dei ki mat kiba la pynkup bor ïa ka District Council lyngba ka Khyrnit ba hynriew bad lyngba ka Riti Synshar ka ri lyngba ka Article 244 bad 275," u la ong.

Shillong, K’lyngkot 29

Ka Khun Hynñiewtrep National Awakening Movement (KHNAM) ha ka Sngi Balang ka la ban jur ban saiñdur thymmai ïa ka District Council lada ka wan ha ka bor ha kane ka ilekshon MDC ban wan.

“Kumba ngi la kren la bun-bun snem halor ki jingeh kiba kum ka jaidbynriew ngi ïakynduh lyngba ka jingtlot bad jingbym lah jong ka District Council ban pyndep ïa ki kamram katkum ka jingai bor ka Khyrnit ba hynriew, ngi kwah ban pynsngewthuh ïa u paidbah ba ka District Council ne kata ka khyrnit ba hynriew ka dei ka kynroh kaba khatduh ka ban ïada ïa ka jaidbynriew,” ong u Working President bad kyrtong ka KHNAM na Jaïaw konstitwensi, Bah Thomas Passah hadien ka jingthep kyrteng na bynta ka ilekshon MDC ha ISBT, Mawïong.

U la ong ruh ba lada ki paidbah kim sngewthuh ïa kane ka bynta, bad lada kane ka kynroh ka khyllem, kata ka jingma ka ap ym tang ïa iwei-ar hynrei ïa ka jaidbynriew hi baroh kawei.

“Ka nongrim jong ngi kumba ngi la ïeng naduh kaba sdang, haba ngi peit bniah ïa ki kyrtong jong ngi, kawei kaba ngi kwah nyngkong eh ka long ba ngin jied ïa kiba biang, ym ïa kiba bun,” ong u Bah Passah.

Ha kajuh ka por, u la ban jur ba ki kyrtong kiba ka seng ka la pynïeng kin long beit kawei ka kynhun – ka jingïatylli ban long beit kawei, da kawei ka jingthmu, kawei ka thong bad kawei ka jingmut bad kata ban saiñdur thymmai ïa ka District Council.

“Hynñiew phew lai tylli ki snem ki la leit na bynta ka District Council…ki jingdiaw, ki jingthnum, ki jingbakla kiba laiphew jait, kumta ka jingthrang bad jingangnud jong uba bun hi kaba hakhmat eh ka long ban pynbha bad pynkylla ïa ka District Council na ka jinglong kaba ka long kumne sha ka bathymmai – kaba lah shisha ban ïada ïa ka khyndew ka shyiap katkum ka jingai bor ka ‘Para’ 3 jong ka khyrnit ba hynriew,” ong u Working President.

Na ka liang jong u, u la ban jur ruh halor ka jingïada ïa ka khaïi-pateng katkum ka Regulation 1954, nalor ka jingïada ïa ki riti-dustur, ïa ki aiñ synshar hima, raid, shnong bad kiwei-kiwei.

“Kine ki dei ki mat kiba la pynkup bor ïa ka District Council lyngba ka Khyrnit ba hynriew bad lyngba ka Riti Synshar ka ri lyngba ka Article 244 bad 275,” u la ong.

Shuh shuh haba pynsngew ba lada ki kyrtong ka seng ki poi sha ka thong, ka jingkyrmen kaba bha kan don ïa ka jaidbynriew, u Bah Passah u la bynrap, “Ngi pyrkhing tyngeh ïa ka jingai ‘Trading License’ sha ki bym dei ki trai-ri trai-muluk khnang ba ka khaïi-pateng kan neh ha ngi ki trai-ri.”

Nalor u Bah Passah, kiwei pat ki kyrtong ka KHNAM kiba la thep kyrteng ha kane ka sngi ki kynthup ïa u Bah Pynshai Mawrie na Mawkynrew, Bah Raymond Basaïawmoit na Mawkhar-Pynthorumkhrah bad Bah Ericton Donbok Swer na Nongthymmai.