Ka la thoh da ka shithi ba kam kwah im shuh, hynrei ym tip ïa ka daw

U la ong ba katei ka samla ka dei kaba dang 16 snem ka rta kaba shong klas 11 ha ka Arts Stream.

Shillong, K’lyngkot 29

Ka jingjia phasi jong kawei ka samla lud ha kawei ka skul kaba don ha nongbah Shillong ka la pynkyndit ïa ki babun-balang ha kaba kane ka jingjia ym tang ba ka la wanrah ka jingsngewsih ïa ki bahaïing jong katei ka samla hynrei wat ïa ki nonghikai bad ki khynnah jong katei ka skul kumjuh.

Na ka liang U Nongsaiñ Hima haba buddien halor kane ka jingjia bad haba ïoh ban ïakren bad u Vice-Principal jong katei ka skul ba leit pule katei ka khynnah, u la ïathuh ba katei ka jingjia ka la jia ha ka 24 tarik u Kyllalyngkot, 2025 hadien ba na ka liang i meiieid jong katei ka samla i la wan ban wad ïa ka ksiew sha skul namar ba ka khlem wanphai shuh sha ïing wat haba la wai skul ruh kaba la pynlong pat ïa ki nongpynïaid skul ban wad ïa katei ka khynnah hapoh ka skul.

U la ong ba katei ka samla ka dei kaba dang 16 snem ka rta kaba shong klas 11 ha ka Arts Stream.

Haba kylli, hato ka jingpynkut noh jong katei ka khynnah ïa la ka jingim ha u tyllai phasi ka dei namar ba kam lah ïa ka eksamin? Na ka liang u Vice-Principal u la ong ba kata kam dei ka jingshisha namar ba katei ka samla ka la wan ban thoh ïa ka eksamin jong ka sha skul nalor ba ka dei ka khynnah kaba stad bad kaba ju wan bha shakhmat ha ki jingpule jong ka.

Haba kylli pat ha kaba ïadei bad ka shithi ba katei ka samla ka la thoh ha shwa ba kan pynkut noh ïalade ha u tyllai phasi, u Vice-Principal u la ong ba katei ka samla ha katei ka shithi ka la thoh ba kam kwah shuh ban im hynrei ym tip pat ïa ka daw halor kata bad ong ba kum ka skul ka khlem poi pyrkhat satia ba kum katei ka jingjia kan wan jia da kaba kyrmen ruh ba kum kine ki jingjia ha kiwei-kiwei ki skul ruh kin ym wan jia shuh nangne shakhmat.

Shuh-shuh, utei u Vice-Principal u la ong ruh ba kum ki khynnah bad ki samla haba ki don ïa kino-kino ki jingeh ha ka jingim kim dei ban buhrieh hynrei ki dei ban pynpaw bad ïathuh ïa kita ki jingeh jong ki khnang ba kan don ka lad-ka lynti ban ïoh ban ai jingïarap.

Lyngba kane ka jingjia kaba sngewsih kaba la wan ban jia ïa ka ïing-ka sem bad kumjuh ïa katei ka skul ba leit pule katei ka samla, ngi ngeit skhem ba kan long ka jinghikai bad ka jingplie ïa ki khmat ym tang ïa ki nonghikai jong ki skul hynrei wat ïa ki kmie-ki kpa ruh ba haba ki ïohi ïa kino-kino ki jingipher ha ki khun-ki kti jong ki, ki dei ban ïasyllok bad ki bad ban wan mih ruh sha ki jaka pule ban ïathuh bad pynpaw ha ki nonghikai skul khnang ba ki nonghikai kin lah ban peit bad ïasyllok bad ki khun jong ki.