Nga don jingkyrmen ban poi sha ka thong namar ka jingieit ki paidbah: Sranly

Kine ki kynthup ïa u Bah Sranly Rongrin kum u kyrtong ka United Democratic Party (UDP) bad u Bah Kodang Rashir kyrtong ka Congress.

Nongstoiñ, K’lyngkot 29

Ka jingthep kyrteng jong ki kyrtong na ki lai tylli ki konstitwensi ha West Khasi Hills ki ban ïakhun ïa ka ilekshon MDC ka la bteng biang ha ka 29 tarik mynta u bnai ha kaba ar ngut ki kyrtong na 29 Mawshynrut District Council Konstitwensi ki la leit ban pyndep ïa ka jingthep kyrteng.

Kine ki kynthup ïa u Bah Sranly Rongrin kum u kyrtong ka United Democratic Party (UDP) bad u Bah Kodang Rashir kyrtong ka Congress.

Ha kane ka sngi leit thep kyrteng jong kine ar ngut kyrtong la synran lang da ki nongkitkam bad ki nongkyrshan jong ki, katba ïa u kyrtong ka UDP Bah Sranly Rongrin la synran lang da u Bah Robertjune Kharjahrin, Vice President ka UDP ka Jylla.

U Bah Saranly u la ong ba ka jingmih ban ïakhun ïa kane ka ilekshon ka long ba u ïohi ïa ki jingeh ha ki thaiñ nongkyndong, ki bun ki jingeh u shem bad ki jingduk ki jingkyrduh ki ïai ban na ka por sha ka por, ka jingeh ha kaba ïadei bad ki nongrep, bad ki lad pynroi ki duna shaba palat bad u ngeit ba kane ka dei ka jingduna palat ki nongïalam.

“Nga don ka jingkyrmen kaba skhem ba ngan poi sha ka thong namar ba ka don kata ka jingieit na ki paidbah bad khamtam eh ïa ka UDP ba ki briew ki don ka jingshaniah,” ong u Bah Sranly.

Katba u Bah Kodang Rashir kyrtong ka Congress u la ong ba ka jingmih jong u sha madan ka long ba u don ka jingangnud ban ïoh ban shakri ïa ki paidbah, bad ka thong hi lada u jop ka long ban pynneh ïa ka riti ka dustur jong ki Khasi khara.

U la ong ruh ba u jied ïa ka Congress namar ka dei ka ‘National Party’ kaba lah ban shakri khambha ïa ki paidbah bad u la ong ruh ba dei tang ka Congress kaba ai ka jingïada ïa ka hok jong ki paidbah la ka long ha ka niam bad ha ka bam ka dih.