Nongpoh, K’lyngkot 29
Katto-katne na ki ‘riew rangbah kiba la mih kyrteng ha ka skhim Shakoikuna River Valley Project kaba la pyllait lyngba ka RIDF XXVI (2021-22) jong ka National Bank for Agriculture and Rural Development (NABARD) ki la pynpaw ïa ka jingbym hun halor ka jingwan jurip jong ka Majistor kaba la bthah da u Deputy Commissioner (DC) ka Ri Bhoi District kaba la pynlong ha ka Sngi Balang halor ka jingkynnoh bamsap ïa ka pisa kaba T.1 klur kumba la mih ha ki lad pathai khubor ha kine ki khyndiat taïew ba la dep.
Katei ka jingkynnoh bamsap ïa ka pisa kaba T.1 klur na ka bynta ban pyntrei ïa ka skhim Shakoikuna River Valley Project ka la paw pyrthei hadien ka jingwad RTI jong uwei u rangbah, ha kaba katkum ka RTI kaba la ïoh, la ïohi ba ïa katei ka skhim la dep ban pyntrei, hynrei kiba bun na ki nongshong shnong ki la pynpaw ba kim ïoh satia ïa katei ka skhim kat haduh ba ki la hap ban mih paidbah ban leit ujor sha u Deputy Commissioner ka Ri Bhoi halor katei ka kam ha kine ki khyndiat sngi ba la dep ban dawa pynlong ïa ka jingtohkit bad ruh ba kin ïoh ïa la ka hok.
Haba kren sha ki lad pathai khubor, u Bah Barnabas Maring u la pynpaw ïa ka jingaikhublei sha u DC ka Ri Bhoi District uba la bthah ïa ka Majistor lem bad ki ophisar ka tnat Soil & Water Conservation ban pynlong ïa ka jingjurip, kaba dei tang katto katne sngi hadien ba na ka liang jong ki paidbah nongshong shnong ki la leit ban ujor sha ka ophis ka jong u halor ka jingpyntrei ïa kane ka skhim hapoh ka shnong Shakoikuna.
Utei u rangbah u la phla ruh ba ka kaiphod kaba na ka liang ka tnat Soil & Water Conservation ka la phah sha ka ophis jong u DC ka Ri Bhoi kam ïadei satia bad katei ka RTI kaba la dep ban ïoh, haba ïa ka kyrteng jong ki briew kiba ïoh ïa katei ka skhim, ki la pynkylla noh bad kam ïahap shuh katkum kaba la paw ha ka RTI bad halor kane ka bynta ruh na ka liang ka jong ki, ki buh la ka jong pat ka jingujor ban lap ïa ki jingshisha.
Shuh shuh, utei u rangbah u la ong ruh ba kum ki paidbah nongshong shnong hi, ki ap khmih lynti bad kyrmen skhem ban ïoh ïa ka jingbishar kaba hok lyngba katei ka jingwan jurip jong ka Majistor bad pynpaw ruh ba lada lashai lashisngi kim ïoh ïa ka kaiphod kaba hun, kim banse ban shim pat da kiwei ki sienjam ban ïaid shakhmat na ka bynta ban ïoh ïa ka hok.
Ha kawei pat ka bynta, na ka liang ki katto katne ki nongshong shnong kiba paw kyrteng ruh ha ka RTI ban ïoh lang ïa katei ka skhim, ki la pynpaw ïa ka jingsngewkhia jur ba wat lada ki la ap baroh shisngi ruh, hynrei na ka liang katei ka Majistor lem bad kiwei de ki ophisar kiba pynlong ïa ka jingjurip, kim shym la leit satia sha ki jaka ki jong ki ban lap ïa ki jingshisha.
Halor katei ka jingbym hun ïa katei ka jingwan jurip, u Bah Jermel Makri u la kynnoh ruh ba kane ka dei ka jingleh jong u Rangbah Shnong, u Bah Henry Nongrum uba la leit ban ïalam bad pyni ïa ka Majistor bad ki ophisar kiba la wan jurip tang ha ki jaka kiba la pyntrei ïa katei ka skhim katba ha ki jaka ki bym pat pyntrei pat u khlem ïalam satia.
Sa uwei de u ‘riew rangbah u la ïathuh ba ha jaka ka jong u ruh, kaba dei ban pyntrei ïa katei ka skhim, la pynkylla kyrteng noh sha uwei pat bad phla ruh ba katkum ka RTI, ïa katei ka skhim wat lada katkum ka RTI la dep ban pyndep naduh ka 17 tarik u Nailar 2023, hynrei kat haduh mynta ruh ym shym la trei eiei bad um pat ïoh wat shi naia ruh. Kumta ha ka jingbym banse u la hap sdang pyntrei hi da ka jinglut-jingsep na ka pla shimet bad pyntip ruh ba kane kam dei satia tang ïa u, hynrei ki dang don bun kiwei kiwei ruh kiba ngat lang ha kajuh ka apot.
