
Shillong, K’lyngkot 29
Kum shi bynta ka jingpynkhreh ïa ka Kiew Pyneh Rngiew kaba shisien shisnem kaba mynta ka kynti kan long ha ka 2 tarik u Rymphang 2025, ka Lum Sohpetbneng Committee jong ka Seng Khasi Kmie ka pynbna ïar sha ki parakur parakha ba mynta ka kynti kane ka kam yn pyrshang ban sdang kham kloi noh.
Ïa kane la ïathuh da u Vice Chairman jong ka Lum Sohpetbneng Committee, Rgh P.B Synrem, haba kren hadien ba la lah ban pyndep ïa ka lehniam shihat shitaïew, ha ka 26 tarik u Kyllalyngkot, ha Lum Sohpetbneng.
La ïathuh ba ka jinglehniam hapoh ka khyrdop kaba mar pyrshah ïa ka pung Umïam, kan sdang ha ka por 6 baje mynstep.
Hadien kane, ka lehniam kaba kongsan bad ba kyrpang tam kan sdang ha ka por 9 baje mynstep halor ka duwan ka dupat ba kyntang.
Kane ka jingthmu ban sdang kham kloi ïa kine ki kam ki jam baroh ka long ban plie lad ïa la ki parakur ki parakha ha ka nguh blei dem blei, ka kyrpad ka kyrpon na ka bynta jong ki bad ba kin ïoh ban diang ‘ti ïa la u khaw eh u khaw khien ryngkat ka umksiar ka umrupa.
Na ka liang u Rangbah Synrem, u ïeng ban pynkynmaw ba ka lynti ban kiew sha kliar u Lum Sohpetbneng ka long kaba khim, ha kaba ki ba bun pat na ki nongwan bunsien ki ïaleh ban wan beit da ki kali ki motor ki jong ki shajan jong une u lum.
Hangne u Rangbah Synrem, u la pynpaw ba ha kine ki khyndiat taïew, ka komiti ka la pynkhreh ïa ki jaka ban pynïeng ïa ki kali, da kaba pynmadan ïa ki jaka kiba dei jong ka Seng Khasi, ha kaba u la kyntu ïa ki parakur parakha ba kin sngewbha ba kin ïatreilang bad ki nongïarap kam jong ka seng ban ym ïa kyrkieh ha ka liang ka leit ka wan bad ban long kiba ïaishah.
Shuh shuh u da kyrpad bad kyntu ruh ba donkam ban long kiba don akor don burom ha ka jingwan ïashim bynta bad khamtam eh ban sumar khuid ïa ka sawdong ka sawkun bad ban ym wiang ding kulmar ïa ki khlaw ki btap bad kumta ter ter.
U Rangbah Synrem um lah ruh ban khlem da pynpaw ïa ka jingkmen ban shem bad ïohi ba ha kane ka kynti kaba mynta wat ha ka lehniam jong ka shihat shitaïew, la bun bha ki parakur ki parakha kiba la wan ban ïasnoh kti ban ïa sakhi bad ruh ban ïashim bynta ha kane ka sngi.