
Jowai, K’lyngkot 29
Ki la don baroh hynriew ngut ki kyrtong kiba la pyndep ïa ka jingthep kyrteng ha ka 29 tarik Kyllalyngkot ha DC ophis, Jowai na ka bynta ka ilekshon MDC sha ka Jaiñtia Hills Autonomous District Council (JHADC) ka ban long ha ka 21 tarik u Rymphang.
Kine kyrtong ki long u President barim jong ka Jaiñtia Student Union (JSU) Rikut N Parien u kyrtong ba nyngkong ban thep kyrteng ban ïakhun na Saphai Sahsniang Konstitwensi na ka Indian National Congress (INC).
U Jesse Suiam uba dei u MDC ba mynta bad kyrtong ka NPP na ka 6-Moodymmai Nongkhroh. U Reformingson Lamare kyrtong ka NPP na ka 7-Nartiang Wahïajer ka konstitwensi kaba dang shu thaw thymmai.
Ka Kong Laiawanlam Jinghun Khynriam kyrtong jong ka Voice of the Peoples Party (VPP) na 9-Mynsoo Nongjngi. U Bah Rudaioo Tang, MDC ba mynta bad kyrtong ka NPP na ka 11-Shilliang Myntang, u la jop nyngkong ha u snem 2014 bad 2019. Kumjuh u Bah Wendolin Shullai kyrtong shimet na Mukhla-Ummulong.
Haba kylli, kine ki kyrtong ki la kular ban bat ïa ka jinglong ba janai jong ka Council bad ban ïakhun na ka bynta ka bha ka miat jong ki paidbah lada ki shah jied.
U Bah Rikut N Parien uba la dep ban ïakhun teng ïa ka ilekshon MDC na Saphai Sahsniang Konstitwensi ha u snem 2019 bad shah rem noh ha u Habahun Dkhar MDC jong ka NPP, haba kren sha ki lad pathai khubor u la pynpaw ka jingsngew skhem ban ïoh ïa ka jingjop ha kane ka ilekshon.
U la ïathuh ba ka thong kaba hakhmat ka long ban pynkhlaiñ ïa ka synshar-khadar hapoh ka council khnang ban lah ban ïada ïa ka khyndew ka shyiap bad ka jinglong ba kyrpang jong ka jaidbynriew.
U Bah Jesse Suiam u la ong ha ki 5 snem ka jinglong MDC, u la leh lut ïa baroh katba shah ka bor naduh ki skhim bad kiwei ki bynta kiba ïadei bad ka council. Ha kaba ïadei bad ka thong, u la ong ba dang bun kiba dangsah ban pyndep khamtam ka kam pud kam sam.
Ka Kong Laiawanlam ka la ong ba ka thong jong ka, ka long ban pynduh ïa ka bamsap bad kum ki kyrtong kin ïeng ïatylli halor ki mat ba kongsan jong ka seng.
U Bah Rudaio Tang u la ong ba ha ki 2 snem ka jinglong MDC u la ïaleh ban pynshna ïa ki surok lyngba ka PMGSY na ka bynta ban pynjan ïa ki shnong hapoh ka konstitwensi bad ban pynsuk ïa ka leit ka wan jong ki nongrep.