Nongstoiñ, K’lyngkot 29
Ka long shisha ka jingjia kaba sngew shyrkhei bad kaba pynsuhjer ym tang ïa ki bahaïing bahasem hynrei ïa ka imlang-sahlang hi baroh kawei halor ka jinglap ïa ka metïap jong kawei ka samla kaba la jia ha ka 20 tarik u bnai Kyllalyngkot 2025 ha kawei na ki jaka ba la tip kum ka ‘Wahriat’ jong ka sor Nongstoiñ hynrei la ong ba haduh mynta la hynñiew sngi ki bahaïing bahasem kim pat ïoh ïa ka jingtip mano ba la leh ïa katei ka kam.
Ki bahaïing bahasem haba kren ha ki lad pathai khubor ha ka 29 tarik mynta u bnai ki la ïathuh ba kane ka khun kaba la suba jur ba ka la shah pynïap ka dei ka samla kaba la tip kyrteng kum ka Lilyioris Wahlang, 21 snem ka rta. Ka dei ka khun kaba phra napdeng khatwei ngut shipara bad ka dei ka khun kynthei kaba hynriew jong u Bah Dhansingh Lyngdoh Nonglait bad ka Kong Wentina Wahlang, kiba shong ba sah ha dong Mawbyrshem jong ka shnong New Nongstoiñ.
La ong ruh ba ha katei ka sngi 20 tarik, ka la mih na la ïing ha ka por 7 baje mynstep khlem wan phai ïing shuh.
Nangta, la ong ruh ba ha ka jinglyngngoh namar ka dei ka samla ka bym ju kham mih na ïing, u kpa jong ka u la leit wad kylleng ki jaka baroh shi sngi. Hynrei hapdeng ka jingwad ha ki bynta ka Wahriat marjan bad ka jaka ba thmu pynlong jaka ot doh, u la lap ïa ki jaiñ jong ka.
Shuh-shuh, la ong ruh ba hadien ba u la lap ïa ki jaiñ u la hiar shuh-shuh kham sharum ryngkat ka jingpyntip sha ki bor pulit, ha kaba ki pulit jong ka Fire and Emergency Service ki la wan poi ban wad lang sharum ka Wahriat. Ha ka jingwad kaba la neh kham slem, ha ka por 4:30 eiei janmiet ki la lap ïa ka metïap jong ka samla kaba la thiah lyngktar ha katei ka jaka. Na ka liang ki pulit ruh ki la shim kam halor kane ka jingjia katkum ka aiñ.
Halor kane ka jingjia, ki bahaïing bahasem ki la kren shai ba ki suba jur ba ki la don ki briew kiba la leh ïa kane ka kam pyrshah ïa ka, katkum ki dak ki shin ba ki la lap bad ki bahaïing bahasem kim ngeit satia ba kane ka khynnah kan leh hi ïa kane ka kam.
La ïathuh ruh ba kane ka khynnah samla ka dei ka khynnah kaba la don ka jingnang jingstad jingsngewthuh bad dang shu pyndep ruh ïa ka klas XII (Science).
Namar kata, na ka liang ka ïing ka sem baroh kawei ka kyntu bad kyrpad rit ïa ka tnat pulit ban shimkhia ïa kane ka kam bad ban thwet haduh ban da ïoh kem bad ban pynshitom da kaba tyngeh ïa ki briew kiba donkti ban pynïap noh ïa ka samla Lilyioris Wahlang.
Shuh-shuh, ki la kyntu ruh sha ki kynhun seng kiba ju peit ïa ka khia ka shon ha ka dong ka thaiñ ba kin shimkhia lem halor kane ka jingjia ïa ka ïing ka sem jong ki, khnang ban ïoh ïa ka hok bad ka jingshisha na ka bynta kane ka samla.
