Shillong, K’lyngkot 29
Ka Congress ka la pynthikna ban buddien halor ka jingpynkylla ïa ka Khyrnit ba Hynriew hapoh ka Riti Synshar ka Ri, lada ka ïoh ban ïalam ïa ka Executive Committee (EC) hadien jong ka ilekshon.
U Bah Pynshngaiñ N Syiem uba dei u Symbud Chief Executive Member barim ka KHADC bad MDC na Mawkhar-Pynthorumkhrah, u la ïathuh ïa 10 tylli ki mat kular ilekshon ba ka seng ka la dep ban pyllait. Ïa kane u la ïathuh hadien ba u la pyndep ïa ka jingthep kyrteng ha ka Sngi Balang.
U Working President ka Meghalaya Pradesh Congress Committee (MPCC), u la ong ba ka Congress kan buddien halor ka jingpynkylla ïa ka Khyrnit ba Hynriew, khnang ba ka jingpynkylla kan long ka jingïarap ïa ki paid riewlum trai Jylla. U la ong ruh ba ka Congress lada ka ïoh ban ïalam ïa ka EC kan pynbha bad pynjanai ïa ka rukom synshar ha ki district council, kan pynbha bad pynjanai ïa ka jingthaw aiñ bad kumjuh ïa ka tnat kaba shim bishar lane kashari. Nalor kine, u la ong ruh ba ka seng Congress kan pynkhlaiñ ïa ka tnat Pla Pisa jong ka council, khamtam ha kaba ïadei bad ka jinglum ïa ki khajna ban ym buh jingeh ïa ki nongtrei na ka jingduh tulop.
“Ngin pynthikna ruh ba kito ki kompani lane ki nongseng kam kiba pan jingbit (NOC) na ka council ki dei ban kren shai, katno ngut ki lah ban ai kam ïa ki samla jong ngi lada ngi ai jingbit ban treikam”, u la ong.
U la ong ba kan dei ka jingïarap kaba khraw lada kawei ka kompani ka lah ban plie lad ïoh kam kumba 20-30 ngut ki samla kane ka Jylla.
“Ka por ka la dei ba kino-kino ki kompani lane ki kynhun seng kam kiba pan jingbit na ka council, ba kin don ïa ka polisi ban ai kam ïa ki samla trai shnong”, la ong u Working President ka Congress.
U Nongïalam ka Congress u la ong ruh ba ka seng lyngba ka district council kan shim ïa ki sienjam na ka bynta ban ïada ïa ka mariang, ki khlaw ki btap bad ki um ki wah da ka jingïatreilang bad ki Hima, Raid bad ki Dorbar Shnong. Ha kajuh ka por, u la ong ba ka seng kan pyrshang ban kyntiew bad ban pynneh-pynsah ruh ïa ka ktien Khasi, ka riti ka dustur bad ka jinglong tynrai.
U Bah PN Syiem u la ong ruh ba ka seng kan wanrah shuh-shuh ki aiñ kiba khlaiñ pyrshah ïa ka jingpynkheiñ ïa ka hok halor ka khyndew ka shyiap jong u Khasi.
Nangta, u la ong ba ka Congress kan thaw ïa ki lad kumno ban ïada ïa ki jaka ha khappud kiba dang hap hapoh u pud u sam jong ka district council da ka jingïatreilang bad ki hima. Nalor kane u la ong ba ka seng kan pyrshang ruh ban pynkhlaiñ ïa ki kashari hapoh ki shnong, ki hima ban pynstet ïa ka jingbishar.
Haba kylli pat ha kaba ïadei bad ka ilekshon kaba u ïakhun, u Bah PN Syiem u la ong ba ki paidbah ka Mawkhar-Pynthorumkhrah kin ai ka jingshaniah ha u ban pynthikna ba un shah jied biang ban leit mihkhmat sha district council.
“Nga sngewskhem ban jop ïa ka ilekshon, namar nga la noh synñiang shibun hapoh ka konstitwensi, bad ha KHADC lyngba ka jingmynjur ïa ki bill bapher-bapher”, la ong u kyrtong ka Congress.
