Nongstoiñ, K’lyngkot:
Ha ka Lah Sngi U Blei jong ka taïew, ka FKJGP Nongstoiñ Circle hapoh ka jingïalam u Bah Brostar Tyrsa, General Secretary bad Bah Ananstar Peinlang, Vice President ki la leit ban jurip ïa ka Nongstoiñ Civil Hospital halor ka jingïoh jingtip ïa ka jingbym biang ki lad ai jingsumar ha katei ka jaka kynthup naduh ki tiar test bad ki doktor.
Ki Nongïalam ka FKJGP Nongstoiñ Circle haba kren sha ki lad pathai khubor ki la ong ba ha katei ka jingjurip wat la ka seng kam shym la ïoh ban ïakynduh ïa u Medical Superintendent namar ba um don hapoh hospital hynrei ka la ïoh lad pat ban ïakynduh ïa u doktor ba dei peit bad ha ka jingjurip bad twad jingmut.
Shuh shuh ki la ong ruh ba ha kane ka jingjurip, ka seng ka la lap ïa bun ki jingbym bit bym biang ha katei ka jaka ai jingsumar ba kynthup ïa ka jingduna ki kali kit nongpang ne ambulance, ka jingbym don ka kali kit met ïap (mortuary van), ka jingbym don ki doktor specialist ban leh ïa ka ultrasound, ka jingkhapngiah ki kamra thiah na ka bynta ki longkmie kiba armet bad kiba la dep kha khyllung ha kaba ki la hap ban thiah wat habar ki ward, ka jingduna ki tiar test, ka jingbym don ki doktor khmat bad ka jingbym biang ki dawai dashin bad ha kaba ha kiba bun ki khep, ki nongpang ki hap ban leit theid hi na shabar.
Ha kajuh ka por ka FKJGP ka la lap ruh ba ka kamra OPD ka long kaba khap-ngiah haduh katta-katta bad katkum ka jinglap jong ka seng ka don tang kawei ka kamra ban leh ïa ka routine check-up.
Ki Nongïalam ka FKJGP ki la pynpaw ruh ba kumba long mynta la i donkam kyrkieh ban plie noh ïa ka Intensive Care Unit (ICU) khnang ba yn lah ban sumar kham kloi ïa kito kiba la kham jur ka jingshitom.
Ha kajuh ka por ka FKJGP, ka la ai jingmut ruh ïa ka tnat ka koit ka khiah ban kham pynbun ïa ki nongtrei khnang ba yn lah ban ai ka jingshakri kaba kham bha ïa ki paidbah.
Khatduh-khatwai, ka seng lyngba ki Nongïalam ka kyntu ïa ki bor ba dei peit ba kin phai khmat bad shim khia ban pynbit pynbiang ïa ki jingdonkam jong ki paidbah ka dong ka thaiñ.
Shuh-shuh, ki la ong ruh ba halor kane ka bynta ka seng kan sa leit mih sha ki bor ba dei peit ïa ka tnat ka koit ka khiah ban buddien na ka bynta ka bha ka miat jong ki paidbah ka thaiñ.
