
Jowai, K’lyngkot 30
U Chief Executive Member jong ka JHADC Ma Thombor Shiwat u la thep kyrteng ha DC ophis Jowai na bynta ban ïakhun ïa ka ilekshon sha ka ïingdorbar jong ka JHADC na Modop Umladang Konstitwensi na ka NPP ha ka 30 tarik Kyllalyngkot.
Haba ïakren bad ki lad pathai khubor hadien ba la dep thep kyrteng, u Ma Thombor u la ong ba ka jingïakhun haduh mynta ka long beit para marwei bad u kyrtong jong ka VPP, kumta ka jingïakhun kam long kaba suk bad yn hap ban trei shitom khnang ban poi sha ka thong.
Ha kane ka sngi, kiwei pat kiba la thep kyrteng na ka NPP ki long u MDC barim u Ma Bison Roy Iano na Raliang Konstitwensi bad u Dr. DI Kjam na Jowai North Konstitwensi.
U Dr. DI Kjam kum nongtrei Sorkar ba la shongthait, u la ong ka daw kaba pynlong ïa u ban ïeng ïakhun ïa kane ka ilekshon ka dei namar ka jingdonkam ban don ïa ki briew kiba shemphang na ka bynta ban kyntiew ïa ka JHADC.
Katba u MDC na ka Sutnga-Nongkhlieh u Ma Richard Lyngdoh u la thep kyrteng ban ïakhun na ka Mynso Nongjngi Konstitwensi na ka Congress, u MDC barim u Ma Hermon Phawa u la thep kyrteng ban ïakhun kum u kyrtong shimet na Nartiang Wahiajer Konstitwensi.
U Bah Richard Lyngdoh u pynpaw ka jingsngew skhem ban jop biang ha kane ka kynti wat lada u ïeng ban ïakhun na ka Konstitwensi kaba thymmai.
Lah ban kdew ba u Richard Lyngdoh u la long MDC la saw sien na ka 24-Sutnga Narwan Konstitwensi ha u 2004, na ka 26-Sumer Konstitwensi ha u 2009 bad na ka 25-Sutnga Nongkhlieh Konstitwensi ha u 2014 bad 2019.
Ha Amlarem Sub Division, ki kyrtong kiba la thep kyrteng ki long u General Secretary barim ka JSU samla Treiborlang Suchen kum u kyrtong shimet na ka 3-War West Konstitwensi, u Bah Wonly L Chyrmang na ka NPP na 1-War East Konstitwensi, u Bah Het Pohthmi na ka NPP na War West Konstitwensi bad u Bah Holando Lamin na ka NPP na War Central Konstitwensi.
U samla Treiborlang Suchen u la ong, ka thong jong u ban ïakhun ïa ka ilekshon MDC ka long ban ïada ïa ka hok long trai man trai kum ki trai ri trai muluk, ban pynneh ïa ka riti dustur bad kolshor ka tynrai jong ki shnong ki thaw, ban wanrah ki lad ki lynti ban kyntiew ïa ki ïew ki hat hapoh ka thaiñ Amlarem Dawki bad kiwei kiwei ki jaka ïew nalor kiwei.