Nongpoh, K’lyngkot 30
Ki nongïalam jong ka Meghalaya Poultry Farmer and Welfare Association (MPFWA) ki la pynpaw ïa ka jingsngewkhia jur ba kum ki nongri syiar ki hap ban mad jingeh na ka jingwan kyrthep jong ki syiar na shabar ka jylla kaba la pynlong ïa ki nongri syiar ka jylla ba kim lah shuh ban ïoh nong lane wat ban pynmih ruh ïa ka bai trai jong ka jinglut jingsep.
Haba kren sha ki lad pathai khubor ha ka Sngi Palei, u President ka MPFWA Bah Daminot Sylliang u la ïathuh ba na ka liang ka seng kam shym la shong kli kti bad ka la ïai trei bad ïai pyrshang ban trei na ka bynta ka jingmyntoi jong ki nongri syiar bad ïathuh ruh ba kum ki nongïalam, ki la dep ban leit kynduh bunsien ïa u Myntri Sorkar ba dei khmih ïa kane ka tnat ba kin leh eiei, hynrei kumba long haduh mynta kim shym la ïoh jingïarap satia na ka Sorkar Jylla.
Halor ka jingbym phai khmat ka Sorkar Jylla sha ki nongri syiar, u Bah Sylliang u la pynshai ba haba nujor bad kiwei pat ki nongri jingri, ka Sorkar ka la pynmih ki lad jingïarap ïa ki da kaba ai nuksa kum ïa ka kam ri sniang, ka Sorkar ka la pynmih ïa ka Piggery Mission, ïa kiba ri Masi da ka Milk Mission hynrei ïa ki nongri syiar pat kam shym la don satia kano-kano ka lad jingïarap na ka Sorkar.
U Bah Sylliang u la ong ruh ka por ka la dei ba ka Sorkar kan phai khmat kyrpang halor kane ka bynta jong ka kam ri syiar ban ai da ki Farmers Identity ban tip bad ïoh jingkheiñ katno uwei u nongri jingri u ri ïa ki syiar khnang ba kin tip ïa ka jingduna ne ka jingbun jong ki syiar ha ka jylla. Nangta, u la bynrap ruh ba kum ha kane ka pyrthei kyrduh kam kiba bun ki khun samla kim donkam donjam bad lada ka Sorkar ka phai khmat halor kane ka bynta kan long ka lad bad pynshlur ïa ki samla ban ïeng ha la ki jong ki kjat lyngba ka kam ri syiar.
Shuh shuh u la ong ba ka jingïohlad ban rung kyrthep jong ki syiar kiba na shabar ka jylla ka la ktah shikatdei ïa ki nongri syiar ka jylla, naba ka dor ka mur ha kine ki sngi ka la nang hiar arsut bad kum ki nongri syiar na ka jylla kim lah shuh ban im, khamtam kito kiba dang sdang lane kiba sdang ban ri tang kumba 100, 200 ne 500 tylli ki syiar.
Ha kawei pat ka liang u Bah Sylliang u la kyntu ïa ka Sorkar Jylla ba ka dei ban ot khajna bad khanglad ïa ka jingwan tuid kyrthep ki syiar khnang ba ki nongri syiar ka jylla ruh kin ïa imlang da kaba bynrap ka jingïoh lait lain jong ki syiar na shabar ka jylla khlem da don ka jingkhmih bniah ïa ka koit ka khiah jong ki syiar, ka buh jingma ïa ki paidbah nongbam syiar ka jylla, da kaba kam ruh ba lada khanglad ïa ka jingwan rung kyrthep, tang na ki nongri syiar ka jylla ruh ki la lah ban pynbiang ïa ki syiar kiba donkam hapoh ka jylla.
