Shillong, K’lyngkot 30
U kyrtong jong ka United Democratic Party (UDP) na Mawkhar-Pynthorumkhrah Konstitwensi, Bah James Ban Basaïawmoit, u la leit ban thep kyrteng ïalade ha ka Sngi Palei jong ka 30 tarik u Kyllalyngkot, 2025 ha Inter-State Bus Terminal (ISBT) ha Mawïong ban ïakhun ïa ka ilekshon MDC sha KHADC ka ban long ha ka 21 tarik u Rymphang, 2025.
Haba kren sha ki lad pathai khubor hadien ba la dep thep kyrteng ïalade, u Bah James u la pynpaw ka jingsngewnguh ïa ki paidbah ka Mawkhar-Pynthorumkhrah Konstitwensi namar ba kim ju mlien ban pan pisa ban kyrshan ïa u kum u kyrtong.
Kumta u la ong ba namar ki paidbah kim ju pan pisa na u, lada u jop ïa ka ilekshon kum u MDC, un trei khuid bad un trei katkum ka jingkwah jong ki paidbah.
“Da ka mynsiem shitrhem jong ki, ki la trei bad kyrshan ïa nga bad haba ma ki, kim pan na nga ïa ka pisa, te nga ruh ngan da jop, ngan trei khuid bad ngan trei katkum ka jingkwah jong ki. Namarkata, da ka pisa ngim dei ban pynmlien da lei-lei ruh em bad ngam kwah ba ka pisa kan pynjop ïano-ïano bad ban pynjot pat ïa ka lawei”, ong u Bah Ban.
U la ong ruh ba na ka liang jong u, um ju pynmlien satia ban sam pisa sha ki paidbah haba u ïakhun ïa ka ilekshon bad ong ruh ba ka jingshah rem jong u ha ka ilekshon kaba la dep ka dei namar ba u khlem sam pisa sha ki paidbah.
“Ha ka ilekshon ba la dep, lehse ngan ïathuh ba ki briew kim poi pyrkhat ba ngan liem hynrei ka dei na ka daw jong ka pisa bad ngim lah ban len ïa kata bad ka pyrthei ruh ka la ïohi baroh kawei ba ki don kito kiba shah bat ha ka jingsam pisa ha ka por shiteng miet hynrei na ka liang jong nga hi, ngam ju pynmlien pisa”, ong u Bah Ban.
