Shillong, K’lyngkot 30
U Myntri Rangbah ka Jylla, Conrad K Sangma u la ong ba ka jingpyntreikam ïa ka Uniform Civil Code (UCC) kam long kaba ïahap ne kaba biang, namar ba ka Ri India ka dei kaba don bun jait ki riti dustur bad ki jaidbynriew.
U la ong ba ka Sorkar kam don jingthmu eiei ban pyntreikam ïa ka UCC.
Kane ka jingkren jong u Myntri Rangbah ka dei hadien ba ka jylla Assam ka la pynpaw ïa ka jingthrang ban bud ïa ki nuksa jong ka jylla Uttarakhand ha ka ban pyntreikam ïa ka UCC.
U la ong ba hap ban sngewthuh ba ka UCC kum ka jingmut bad ka UCC kum ka Bill ne aiñ ba kyrpang ki dei ar tylli ki bynta ba kyrpang kiba ym dei ban pynïasoh lang.
U la ong ba ka Uniform Civil Code ka dei ka jingthmu ban pynlong ïa kiei-kiei baroh kiba ryntih lang, bad pynpaw ba kam long kaba ïahap hapoh ka ri India.
“Ki don ki riewlum bad ki trai ri trai muluk kiba don ïa ki jingleh bad jinglong kiba kyrpang, kiba lah ban ym ïahap bad katei ka jingthmu pynïaid ryntih”, u la ong.
U la ong shuh shuh ban pyntreikam ïa ka jingïaryntih lang ha man la ki bynta jong ka jingim, ïa baroh ki jaidbynriew kam lah ban long.
Ha kajuh ka por u Conrad u la kubur ba ki don katto-katne ki bynta jong ka aiñ kiba ïadei hapdeng u riewshimet bad ka imlang-sahlang ki dei kiba lah ban shna ban ïada ïa ka hok jong ki jaidbynriew trai ri.
U la ong ruh ba ka Uttarakhand ka dei ka Jylla kaba nyngkong ban pyntreikam ïa ka UCC, hynrei kam shym la kynthup pat ïa ki rukom im bad rukom leh ïa ki dustur tynrai jong ki riewlum ha katei ka bynta.
“Lada ïa ka Bill ka pynbna ba ha ka ri baroh kawei dei ban shim jait na ka kmie, ka jylla Meghalaya kan kyrshan ïa kane, namar ngi dei ka jaidbynriew kaba shim jait na ka kmie. Kan shong baroh ha ka rukom pynwandur ïa ka Bill, kiei ki bynta kiba la thaw ban don ïa ka jingryntih lang bad ha kano ka lynti”, la ong u Conrad.
Namar kata, na ka liang u Myntri Rangbah u la kren shai ba ka Jylla Meghalaya kam don jingthmu eiei ban pyntreikam ïa ka UCC.
