Shillong Nailur 27
U Bah Prestone Tynsong uba dei u President ka NPP Meghalaya State Unit bad ruh Symbud Myntri Rangbah ka Jylla u la pynpaw ba ka jingshah rem ha ka ilekshon ha u snem 2024 bad 2025 ka la dei na ka jingjur palat jong ki khubor thok kiba la pynsaphriang ha ki rynsan ‘social media’ ban ïalam bakla ïa u paidbah.
“Mynta nga la sngewthuh shai ba ka daw jong ka jingshah rem ïa ka ilekshon ha u snem 2024 bad 2025 ka dei tang namar ka jingjur palat jong ka jingpynsaphriang ïa ki khubor thok khubor lamler ha ki rynsan social media ban ïalam bakla ïa ki paidbah,” la ong u Bah Prestone ha ka jingïalang ïalap ilekshon na ka bynta u kyrtong u Dr DRL Nonglait ban ïakhun ïa ka ilekshon MP shiteng samoi ka ban sa pynbna shen.
Ïa katei ka jingïalang la pynlong da ka NPP Pynursla Block ha Wahlyngkhat ha ka sngi Saitjaiñ, ha kaba nalor u Bah Prestone, la ïadon lang u kyrtong MP ka NPP Dr DRL Nonglait, ki MLA kiba kynthup ïa u Bah Charles Marngar, Bah Gavin Mylliem, MDC ka Nongskhen Constituency Kong Grace Mary Kharpuri, ki nongïalam ka NPP bad da ki hajar ngut ki paidbah kiba la pyndap ïa ka jaka pynlong jingïalang.
Shuh shuh haba ai jingkren, u Bah Prestone u la pynshai sha ki paidbah ba ki khubor kiba la saphriang ha ki social media, kim dei satia kiba shisha hynrei tang ki khubor kiba ïalam bakla. “Ha kine ki 2 sngi kiba la dep, nga la leit sha Delhi ha kaba ïadei bad ki kam Sorkar hynrei la pynsaphriang pynban ïa ki khubor thok ha ki social media, hana ba u Bah Prestone u la kwah ban long Myntri Rangbah ka Jylla,” u la ong.
U la ong ba ha ka 23 tarik u la leit sha Delhi bad ha ka 24 tarik pat u Myntri Rangbah Conrad K Sangma lem bad u Bah Sniawbhalang Dhar, Symbud Myntri Rangbah ki la wan poi bad ha kaba la don ka jingïalang bad ki heh ha Delhi.
“Nga shu kwah ban pynkynmaw ïa phi ba ha ka ilekshon ha u 2024 bad 25, pleng nga sngewthuh hangne, ba kito ki artylli ki ilekshon kiba ngi shah rem ki dei kiba ïaid da ka social media bad haduh katto ka treikam ka social media ban pynsngewthuh bakla ïa ki paidbah tang da kaba ki thoh laiphew jait laiphew rukom da kaba shu thok, shu jler bad nga kwah ba kiba kum kita ki briew kin ai jubab hakhmat jong ngi u paidbah,” ong u Bah Prestone.
Ha kawei pat ka liang, u Bah Prestone u la kynthoh ruh ïa ka Voice of the People Party (VPP) kaba synshar ha Khasi Hills Autonomous District Council (KHADC) halor ka jingpynduh pyndam noh ïa ka kyndon jong ka Land Act, ha kaba wat na ka liang jong u Lat ka Jylla ruh um shym la ai jingmynjur bad ban pynphai noh ïa katei ka Amendment Bill.
Ha kaba ïadei bad ka jingïalap ilekshon ïa u kyrtong ka NPP, u Bah Prestone u la ong, ba u Dr DRL Nonglait u dei u riew rangbah uba shemphang, sngewrit, tipbriew tipblei bad uba don burom bad akor, kumta kan long kaba eh bha ban ïoh ïa kum une u rangbah bad u la kyrpad ïa ki paidbah ban ai ka jingkyrshan kaba pura bad pynjop ïa u ha ka ilekshon MP shiteng samoi ka ban sa long shen.
