Shillong, Nailur 27
U General Secretary barim ka Khasi Students Union (KSU) u samla Donald V Thabah u la ong ba lada ki jaidbynriew Garo kiba don ha rilum Khasi lada ki kwah ban thoh eksam District Selection Committee (DSC) ki dei ban nang ban thoh bad kren Khasi.
U la ong ba lada ki Khasi ki kwah ban leit thoh eksam DSC ha rilum Garo ruh ki dei ban nang ïa ka ktien Garo khnang ban ïa burom mar kylliang hapdeng ki ar tylli ki jaidbynriew haba shong bad sah ha kawei ka jylla Meghalaya.
Kane ka jingpynpaw u samla Donald ka dei hadien ba ki jaidbynriew Garo kiba sah ha rilum Khasi hapoh ka lama jong ka All Khasi Hills Achik Joint Action Committee (AKHAJAC) ki la dawa na ka Sorkar ban ailad ban thoh eksam ruh da ka ktien Garo ha ki DSC ha rilum Khasi namar ki la ïa bun.
U samla Donald u la kyntu ïa ka sorkar ba ka dei ban pynneh beit ïa kaei kaba la dep pynbna ba ki eksam DSC ha rilum Garo kin thoh beit da ka ktien Garo bad sha ri Khasi kin thoh da ka ktien Khasi.
U la ong ba lada leit thoh eksam sha Bihar dei ban nang ban kren hindi, haba leit thoh eksam sha Mizoram dei ban nang ïa ka ktien Mizo bad ha Manipur lada kwah ban leit trei ha jaka sah ki Meitei, Naga bad Kuki dei ban nang ïa ka ktien jong ki ruh.
Kumta u la kyntu ïa ka sorkar ba kam dei shuh ban pynkylla kumba ka la dep kular namar kane ka dei ka mat kaba ka seng kaba la dep dawa la slem bha.
