Shillong, Nailur 27
Ki kynhun jong ki sengbhalang ha ka 27 tarik u Nailur 2026 (Sngi U Blei), ba kynthup ïa ka Khasi Students Union (KSU), HITO, Confederation of Meghalaya Social Organizatins (CoMSO), FKJGP, JSU, bad ka Achik Youth Welfare Organization, ki la leit ban khang khyrdep ïa baroh ki Bank kiba plie ha kane ka sngi, ban pynpaw ka jingpyrshah ba ki treikam ha ka sngi U Blei, kaba dei ka sngi kyntang jong ki Khristan.
Ka KSU, lyngba ki district, circle bad ki unit, ki la leit ban khang ïa ki bank ba kynthup, ka SBI, Punjab National Bank, Meghalaya Rural Bank, Indian Overseas Bank bad UCO Bank ha Shillong, East Khasi Hills, Ri-Bhoi, Eastern West Khasi Hills bad Jaiñtia Hills District.
Ha Garo Hills, ka Achik Youth Welfare Organization bad ka FKJGP ki la lamkhmat ban khang khyrdep ha baroh san tylli ki district.
Ka KSU ka pynpaw ba ka jingkhang khyrdep ïa kine ki jaka treikam ka long halor ka jingdawa ban burom ïa ka sngi mane bad ka sngi ban leit jingïaseng jong ki riewngeit Khristan, khamtam ha ka imlang sahlang jong ka Bri Hynñiewtrep, kiba bun na ki nongshong shnong ki long ki riewngeit Khristan.
“Kane ka jingleh ka long ban pyni shai ba ka sngi U Trai, kadei ka sngi kaba kyntang kaba don ka jingmut kaba kyrpang na ka bynta ki bangeit Khristan ha ka ri jong ngi,” ka la ong.
Ka KSU ka la kyntu ïa baroh ki Bank bad kiwei-kiwei ki jaka treikam kiba dang plie ha ka sngi U Blei, ba kin pyrkhat bad burom ïa ka jinglong kyrpang jong kane ka sngi, khnang ba ki nongtrei ruh kin ïoh ïa ka lad ban pynlut por bad ka ïing ka sem bad ban pyndep ïa ki kam niam jong ki.
Na ka liang ka HITO ka la pyntip ba ki nongïalam sengkmie bad ki district ruh kumjuh, ki la leit jngoh ïa ki tnad treikam PNB, SBI, South Indian Bank, YES Bank, Canara Bank and Central Bank of India ba don ha Mawkyrwat, Dawki, Shillong, Mairang bad kiwei kiwei de ki jaka.
Hadien ba la ïoh jingtip ba ki bank kin plie ha ka Sngi U Blei, “Ngi la rai ban leit sha ki jaka ba plie, ban pynpaw ïa ka jingpyrshah jong ngi bad ban kyntu ïa ki bor ba dei peit, ban burom ïa ka jinglong kyntang jong ka sngi U Blei ha Meghalaya,” la ong ka HITO.
Ka seng ka la ïoh pdiang ïa ka jingbthah jong ka Sorkar Pdeng kaba bthah ïa ki bank, ban trei ha ka 27 tarik u Nailur 2026, kaba dei sngi U Blei, shuwa ka jingthmu ban ïakhih ha ka ri baroh kawei naduh ka 28 haduh ka 30 tarik u Nailur.
“Watla ngi sngewthuh ïa ka jingdonkam ban pynneh pynsah ïa ki jingshakri ha ki bank, ban pynïaid ïa ki kam Sorkar, kam dei ban pynduhjait ïa ka sngi U Trai, kaba dei ka sngi na ka bynta ka jingshakri ki Balang, ka jingmane, ka jingduwai bad ka jingïadon ryngkat bad ka longïing bad ka imlang sahlang ha Meghalaya,” ong ka HITO, da kaba kyntu ïa ki bor synshar ban pyrkhat ïa ka jinglong ba kyrpang jong ka niam bad ka imlang sahlang.
Na ka liang ka FKJGP, ka la pynpaw ka jingpyrshah, da kaba ong ba kan nym ailad satia ba kin pyndonkam bakla ïa ka sngi , kaba kum ki khristan ki ñiew burom bad kane ka jingleh ka long ban ïuhroit ïa ka hok long briew man briew.
