Shillong, Nailur 27
Haba ban jur ban kham pynkhlaiñ ïa ka jingpyntreikam ïa ki kyndon ba ïadei bad ka jingbret ïa ki jaboh-jabaiñ ha ka rukom ba dei, da kaba pynleit jingmut ïa ki risol kiba mih, ka Adviser ka Sorkar MDA, bad nongmihkhmat ka East-Shillong, ka Kong Ampareen Lyngdoh ka la ong ba ïa ka ‘Swachhata Hi Seva’ dei ban pynïaid hi da ki nongshong shnong da lade.
Ka Kong Ampareen haba kren ha ka ‘Workshop’ halor ka ‘Solid Waste Management Rules, 2026’, kaba la pynlong da ka tnad pynroi sor ha ryngkat ka jingïasnohktilang bad ka PIB kum shi bynta jong ka ‘Swachhata Hi Seva 2026’, ka la ong, “Kane ka dei ban long ka prokram kaba pynshong nongrim ha ki nongshong shnong ha ryngkat ka rukom treikam kaba pynshong nongrim ha ki nongshong shnong. Ngi, ha ka nongbah ngi la pynsngewthuh bha sha ki nongshong shnong ba phi hap ban kyndit thiah, ban shimkhia, bad ban don ïa kajuh ka jingmut halor ki jingkitkhlieh ban aiti ïa ka mariang kaba lah ban im da ki pateng ban wan.”
Ka la ong ba ïa ki jingïakren dei ban pynkylla sha ka saiñdur kaba shai bad kaba ïaineh bad ka jingthmu kam dei ban long tang ban pynurlong ïa ki thong ba la buh da ka Sorkar India hynrei ban wanrah ïa ki jingpynbha kiba lah ban ïohi ha ki shnong ki thaw.
Ka Kong Ampareen ka la kdew ba ïa ka Meghalaya la ju bna na ka bynta ka jingkhuid-jingsuba bad kane kajuh ka mynsiem ka dei ban pur naduh ki ïing ki sem sha ki shnong ki thaw bad ki jaka paidbah lyngba ka jingpynsngewthuh paidbah bad ka jingïatreilang jong ki tnad treikam bad ki bor ba dei khmih.
U Director ka tnad pynroi sor, u P.K. Boro u la ong ba ka ‘Swachhata Hi Seva’ ka hap ban long ka jingïashim bynta ba ïaineh jong ki paidbah bad ym lah ban pynurlong tang da ki ophisar. U la ong ba ka Shillong Municipal Board ha kine ki lai snem ba la dep ka la kynthup ïa ki jaka pule bad ki Dorbar Shnong, da ka jingai kyrdan, ki jingai mynsiem bad ki khusnam ‘Best Five’ ban pynneh-pynsah ïa ki jingpyrshang ban leh khuid.
U Assistant Director ka PIB, u Gopajit Das u la ong ba ka tnad Information and Broadcasting jong ka Sorkar Pdeng lyngba ka jingthmu jong ka ‘Vartalap’ kan kyrshan ïa ka jingïasaid na ka bynta ki kyndon jong u snem 2026 khnang ba ki paidbah kin sngewthuh ïa ki jingkitkhlieh jong ki katkum ka aiñ.
Ka ‘Workshop’ ka la lum lang ïa ki nongthaw polisi, ki nongpynïaid, ki nongïalam Municipal bad ki nongshim bynta ha ki shnong ki thaw ban batai ïa ki jingkitkhlieh, ban khmih bniah ïa ka jingkiew ha ki jaka sor bad kiwei-kiwei.
Ki ‘Technical Session’ na u stad saian ka CPCB, u Arnab Mandal bad ki ophisar jong ka Meghalaya State Control Pollution Board ki la ïakren halor ka rukom treikam ka stad saian jong ka jingpynïakhlad, jinglum, jingpynkhreh bad jingpynkhuid, ka jingpynïakhlad ha ki saw bynta ïa ka jaboh-jabaiñ nalor kiwei.
