Shillong, Nailur 27
U Chairman ka Confederation of Meghalaya Social Organizations (CoMSO) u Bah Roykupar Synrem, u la pynpaw ka jingsngewkhia halor ka jingbym shimkhia ka Sorkar Jylla ban pynbeit ïa u pud u sam bad ka Jylla Assam ha kaba u la kynthoh ba ka Sorkar ka khihkhoreh ban thaw ïa ki Regional Committee tang haba jan ka ilekshon.
“Ha shuwa jong ka snem 2023 ka la don ka jingkhih khohreh ka Sorkar Jylla ban thaw ïa ki Regional Committee bapher-bapher, ha kaba na ka liang u Myntri Rangbah ka Jylla ha ka jingïadonlang u Myntri Rangbah ka Jylla Assam ki la leit ban pynlong jingïalang haba ïadei ka Langpih Sector” u la ong.
U Bah Roy haba kren sha ki nongthoh khubor u la ong ba hadien jong ka ilekshon 2023, ym ïohi eiei shuh ba kita ki Committee kin treikam bad kaba ka Sorkar ka pynpaw ka long ba ka dang ap ban kut ka ilekshon hapoh Assam, hynrei mynta la dep ka ilekshon ka Assam ka la dep ban ïoh ïa ka Sorkar katba ym don ka jingshimkhia na ka liang ka Sorkar haba ïadei ban pyndep ïa ka jingïapynbeit u pud u sam ba pura khamtam ki bynta ba dei jong ka Langpih kumjuh ka Block-I, Block-II.
“Ngim tip ïa kaei ba ka Sorkar ka ap, ka ap ïoh lehse ba ka Jylla ruh sa tang katno kan poi ka ilekshon 2028 bad ïohlehse ka ap ïa kata ka por ban pyni ba ka la shimkhia ban leh ïa kaba donkam bad haba ki leit ha khmat u paidbah kin ïoh ban ong, ailad biang ïa ngi sa shisien khnang ban lah ban pynurlong ïa kine ki jingïa kajia pud hapdeng ka Meghalaya bad Assam” la ong u Bah Roy.
Shuh-shuh u la ong ba kum ki nongshong shnong ka Jylla ki la mat ïa kine ki jingeh naduh ki snem ba la ïoh ïa ka Jylla ba pura bad kaba la sahteng haduh mynta,
U Bah Roy u la pynkynmaw ba mynta ka Sorkar MDA-II ha Meghalaya, ka Sorkar BJP ha Assam bad ka Sorkar NDA ha ka Sorkar Pdeng, kine baroh lai tylli ki Sorkar ki dei kiba ïasynrp bad ki din ka jingïajan ha ka kam synshar, namar kata kan kham pynsuk ban pynbeit ïa kine ki jingeh lada ki don ïa ka mon. hynrei u la kynnoh kaba paw mynta bun ki pynlong mat sengsaiñ pyrthei ïa kane ka kam bad ki leh ïa kane tang ba ïoh myntoi ha ka kam saiñpyrthei.
U la buh ka jingkyntu ïa ka Sorkar Jylla ba ka dei ban shimkhia ïa kane ka mat, “Lada buh sah ïa kine khlem da pynbeit, ki lah ban mih kiei kiei ki jingjia ban ïalam sha ka jingsngewsih bad ka long kaba pynsngewsih ïa ki nongshong shnong ïa ka jaidbynriew hi baroh kawei” u la ong.
