Shillong, Nialur 27
Ka Khun Hynniewtrep National Awakening Movement (KHNAM) ka la pynpaw ïa ka jingsngwkhia haba ïadei ka jingïoh bsuh khlieh ka sengsaiñ pyrthei ka Bharatya Janata Party (BJP) ha ka Jylla na ka jingleit pynïasoh ki 8 ngut ki MLA ka UDP bad kdew ba kane ka long ka sienjam kaba lah ban wanrah jingma ïa ka synshar khadar hapoh ka Jylla.
U President ka KHNAM u Bah Thomsa Passah haba kren sha ki nongthoh khubor u la ong ba ha ki snem kiba la dep ka BJP kum ka sengsaiñ pyrthei ka la pynshang lyngba ki ilekshon ban ïoh ban synshar ïa ka Jylla Meghalaya, hynrei u paidbah ka Jylla u khlem shem la ai ka bor, kumta kan ïaleh beit da kiwei ki buit ban ïoh synshar.
Haba ïadei ki jingkular ka BJP ha ka jingleit pynïasoh ki nongmihkhmat jong ka UDP, u Bah Passah u la ong ba ka ktien Khasi, ka dei kaba la jan urlong, Namar ka jingdawa ban pynrung noh ïa ka ktien Khasi ha ka Khyrnit baphra jong ka riti synshar ka Ri India ka la don ha ka lynti ban ïoh ïa ka jingmynjur.
Haba ïadei ka FCRA u la ong, ba lada ka BJP ka ong ïa ki MLA ka UDP ban pynlait ïa ka jingtreikam jongka ha ka Jylla, hynrei donkam ban sngewthuh ba balei la wanrah ïa kane ka aiñ bad mano ba wanrah ïa kane kaba long pyrshah ïa ki khristan hapoh ka ri India.
U la kynthoh haba ïadei ki mat ba ki MLA ka UDP ki buh hakhmat ka BJP haba ki leit ban pynïasoh sha ka BJP, ha kaba ym shym la kynthup ïa ki mat ba kiba pynkhlaiñ ïa ka jaitbynriew ba kynthup ka jingdawa ban pyntreikam noh ïa ka Inner Line Permit (ILP) bad ka Instrument of Accession (IOA) hapoh ka Jylla.
U Bah Passah u la pynpaw ba ka don ka jingma kaba khraw ïa ka jaidbynriew ritpaid bad ka synshar khadar lada ka BJP ka ïoh ïa ka bor ban synshar ha ka Jylla Meghalaya, “Lada ka BJP ka ïoh ban synshar ïa ka Jylla Meghalaya ha 2028, kan dei ka jingsdang jong ka jingduhjait jong ka Jaidbynriew jong ngi na ka ri kaba ïeid jong ngi” u la ong bad bynrap ba ka lah ban buh jingma wat ha ka rukom ban jied ïa ki nongmihkhmat ha ki snem ban dang wan lyngba ki buit jong ka BJP na ka rukom pyntreikam ïa ki EVM mashin ha ka por ilekshon.
