Nongstoiñ, K’lyngkot 30
Ar ngut ki kyrtong ban ïakhun ha ka ilekshon sha ka Khasi Hills Autonomous District Council (KHADC) na Nongstoiñ Konstitwensi kata u Bah G Ningstar Marthong jong ka Congress bad u Bah Dresser Marngar jong ka NPP ki la pyndep ban thep kyrteng hakhmat u Returning Officer ha ka Sngi Balang ka 30 tarik mynta u bnai.
Ha kane ka sngi ïa u kyrtong ka Congress la synran lang da ki nongkitkam ka seng bad ki nongkyrshan jong u, katba ïa u kyrtong ka NPP la wan ban synran lang da u MLA ka Nongstoiñ Bah Gabriel Wahlang, u MLA barim ka Nongstoiñ Bah Macmillan Byrsat, ki bahaïing jong u kyrtong bad ki paidbah nongkyrshan.
Haba kren sha ki lad pathai khubor, u kyrtong ka Congress Bah G Ningstar Marthong u la ong ba man u briew u don la ka jong ka jong ka thong bad ka jingmih noh u Bah Gabriel Wahlang na ka Congress kam don satia kano-kano ka jingktah ïa ka seng namar ki paidbah ki dang shaniah ïa ka Congress naduh ka Jylla bad ha ka Ri India hi baroh kawei.
U la ong ruh ba lada u poi sha ka thong un ïaleh ban nang pynskhem ïa ka 6th Scheduled bad ruh ban nang pynkhlaiñ ïa ka pla tyngka jong ka Council.
U kyrtong ka NPP Bah Dresser Marngar u la ong, u don ka jingkyrmen kaba skhem ban jop ïa kane ka ilekshon namar ma u ryngkat ki nongkyrshan ki la trei shitom naduh ki bnai ba la dep. Lada un poi sha ka thong un ïaleh ban pynneh ïa ka riti ka dustur bad nang pynskhem ïa ki nongrim tynrai jong ka, katkum ki aiñ kiba la don ha ka Article 244 A kiba pynlong ïa ka 6th Scheduled kiba kongsan kum ka Paragraph kaba 3, 8 bad kaba 10.
U Bah Macmillan Byrsat, MLA barim ha kajuh ka por kum u District President ka NPP u la ong, ka nongrim jong ka NPP naduh ba sdang hi ka long ban pyrkhat kyrpang ïa ka jinglong kyrpang jong ki rit paid jong ka thaiñ shatei lam-mihngi jong ka Ri India.
U Bah Macmillan u la ai khublei kyrpang ïa ki paidbah ka Rambrai, Mawshynrut bad Nongstoiñ konstitwensi da kaba u la ong ba wat ym sngap ïa ki kyntien ba shu ïalam bakla bad u la kyntu ba kim dei ban shah ïalam da ka jingsngew, namar lada ka jaidbynriew ka shu shah ïalam da ka jingsngew kan ym poi shaei-shaei hynrei hap ban bishar kaei ka lynti kaba bha tam bad nangno dei ban ïaid ban long u ksiang bad ka Sorkar Jylla ban wanrah ïa ki kam ha ka roi ka par ha ka konstitwensi.
“Nga sngew ban kyrpad ïa ki paidbah jong ka Nongstoiñ, Rambrai, Mawshynrut konstitwensi ba ha ka ilekshon MLA ha u 2023, phi la ai nod ïa ka NPP napoh ka District bad nga da kyrpad jur ba ha kane ka ilekshon sngewbha pynjop ha baroh lai tylli bad kata ka long ka dak ba ngi, ngi ïa don bynta bad ka Sorkar kaba synshar hapoh ka Jylla Meghalaya,” u la ong.
Shuh shuh u la ong ruh ba kaba ar pat ha kine ki sngi ki mih ki jingïalam bakla hangne hangtai ban ong ba u Bah Macmillan Byrsat MLA barim um ïatreilang bad u Bah Gabriel Wahlang MLA ba mynta, ha kaba u la ong ruh ba ma u lei-lei u dei u nongseng ïa ka NPP hapoh Nongstoiñ bad u kwah ban ïohi bad pynthikna ba ki paidbah jong ka West Khasi Hills District mynta kin jied ïa ka NPP.
U Bah Macmillan u la ong ruh ba haba ïakren ïa ki riti ki dustur, ka dei ka thong kaba hakhmat ka jong ki ban nang pynbha shuh shuh bad lada ïa u kyrtong jong ka seng ki paidbah ki ïa kyrshan kin ïatreilang ba ïa kiei kiba kim pat lah ban pyndep ha kine ki snem ba la dep kin pyndep mynta.
Katba u Bah Gabriel Wahlang pat u la ong ba ka lama jong ka NPP ka dei ka lama jong ka roi ka par hapoh ka Nongstoiñ bad ka donkam ban don bad ka Sorkar ban ïoh ban pynroi shuh shuh ïa ka Nongstoiñ bad ki dang don bun bah ki jingeh ïa kaba ki paidbah ka Nongstoiñ ki dang donkam.
U la ong ruh ba u kwah ban pynshai sha ki paidbah ba kam don kata ka jingbym ïa sngewthuh jingmut hynrei ki don ka jingïasngewthuh jingmut na ka bynta ka roi ka par jong ka konstitwensi. Kumta u la kyntu ïa ki paidbah ba kumba ma ki, ki ïa tylli na ka bynta ka jingbha jong ka Nongstoiñ kum ki paidbah ruh kin ïa tylli na ka bynta ka roi ka par ka Nongstoiñ ban pynjop ïa u kyrtong NPP.
